ԲԴԽ-ն շարունակում էր Վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությունը (տեսանյութ)
Բարձրագույն դատական խորհրդում նիստին հաջակցություն Ազարյանի ներկա են տարբեր ատյանների դատավորներ. Արշակ Վարդանյանը, Արման Հովհաննիսյանը, Մխիթար Պապոյանը, Դավիթ Բալայանը, Դավիթ Հարությունյանը։ Նիստերի դահլիճում է գտնվում նաև Վերաքննիչ քրեական դատարանի նախագահ Վազգեն Ռշտունին։
Այս պահին ելույթով հանդես է գալիս Ալեքսանդր Ազարյանի ներկայացուցիչ Տիգրան Աթանեսյանը, ում խոսքով՝ այս վարույթը հարուցվել է այն պատճառով, որ դատավոր Ազարյանն անձեռնմխելիության հիմքով կալանքից ազատ է արձակել ՀՀ 2-րդ նախագահ, «Մարտի 1»֊ի գործով մեղադրյալ Ռոբերտ Քոչարյանին, ինչը դուր չի եկել ՀՔԾ պետ Սասուն Խաչատրյանին։
Հիշեցնենք, որ ՀՀ Բարձրագույն դատական խորհրդում շարունակվում է ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությունը։
Հիշեցնենք նաև, որ կարգապահական վարույթը հարուցել է արդարադատության նախարար Ռուստամ Բադասյանը՝ ՀՔԾ պետ Սասուն Խաչատրյանի հաղորդման հիման վրա: Նիստի ընթացքում Ազարյանի պաշտպան Տիգրան Աթանեսյանը կմիջնորդի ԲԴԽ-ին` որպես վկա հրավիրել Սասուն Խաչատրյանին՝ մի շարք էական հանգամանքների շուրջ ցուցմունք տալու համար:
Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ հարուցելու վերաբերյալ հաղորդումն Արդարադատության նախարարություն է ներկայացրել Հատուկ քննչական ծառայության կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանն, ում վարույթում քննվել է «5-րդ Ալիքի» սեփականատեր Արմեն Թավադյանի վերաբերյալ քրեական գործը։










