Ծաղկաձորում Կառավարության սուբվենցիոն ծրագրով կառուցապատման աշխատանքներ են իրականացվում
Կոտայքի մարզի համայնքներում շատ շուտով կմեկնարկեն կառավարության 2020թ. սուբվենցիոն ծրագրերի շրջանակներում նախատեսված լայնածավալ շինարարական աշխատանքներ՝ չնայած որոշ հաստատված ծրագրերի շրջանակներում արդեն մի քանի համայնքներում շին.աշխատանքներ են իրականացվում: Այս մասին հայտնում են ՀՀ Կոտայքի մարզպետարանից:
2020թ. սուբվենցիաներին զուգահեռ, մարզի տարածքում շարունակվում են իրականացվել նաև 2019թ. մեկնարկած սուբվենցիոն ծրագրերը:
Արդեն ավարտվել են 2019թ. սուբվենցիայով իրականացված ներհամայնքային ճանապարհների հիմնանորոգման, լայնացման, մայթերի կառուցման և եզրաքարերի տեղադրման աշխատանքները: Շուրջ 106.914.100 դրամ արժողությամբ ծրագրի շրջանակներում Ծաղկաձորում հիմնանորոգվել է մոտ 1,5 կմ ժանապարհահատված: Այս ծրագրին պետական բյուջեի ֆինանսավարման չափը 45 % է: Ի դեպ, միջգերատեսչական հանձնաժողովի կողմից արդեն հաստատված 2020 թվականի սուբվենցիոն մի քանի ծրագրերով Ծաղկաձորում այս պահին հիմնանորոգվում են ևս 1,5 կմ տարածք ընդգրկող ներհամայնքային ճանապարհներ, ինչի արդյունքում Ծաղկաձորում ամբողջությամբ կավարտվեն ճանապարհաշինական աշխատանքները:
Մեկ այլ ծրագրով Ծաղկաձորի մանկապարտեզին կից նոր մանկական արվեստի դպրոց է կառուցվում: Նախկինում արվեստի դպրոցը տեղակայված է եղել մանկապարտեզի տարածքում, որտեղ հաճախել է 67 սան: Արդեն առանձին գործող մանկական արվեստի դպրոցը էականորեն կբարձրացնի հաճախելիությունը, և մեր երեխաները կկրթվեն ավելի լուսավոր և բարեկարգ պայմաններում:
2019թ. հաստատված երրորդ ծրագրով բարեկարգվում է մանկապարտեզի բակային հատվածը: Շուրջ 81.900.000 դրամ արժողությամբ ծրագրի շրջանակներում կառուցվում է ընդարձակ բակ՝ նոր հենապատով և նոր մարզագույքով հագեցած խաղահրապարակով: Ամբողջովին փոխվելու է ջրահեռացման համակարգը, որը երկար տարիներ խնդիր է հանդիսացել ամբողջ համայնքի համար: Այս ծրագիրն իրականացվում է պետություն-համայնք 50 % /50 % համաֆինանսավորմամբ:












