ԱՄՆ-ում ցանկանում են Վաշինգտոնը դարձնել երկրի 51-րդ նահանգը. Ներկայացուցիչների պալատում այսօր սպասվում է այս հարցով քվեարկություն
ԱՄՆ Կոնգրեսի Ներկայացուցիչների պալատն այսօր` հունիսի 26-ին, կքվեարկի երկրի մայրաքաղաք Վաշինգտոնի կարգավիճակը որոշելու հարցով, այն առաջարկվում է դարձնել երկրի 51-րդ նահանգը:
Ներկայում Վաշինգտոնը վարչական տեսանկյունից հանդիսանում է Կոլումբիայի դաշնային շրջան, որը որևէ նահանգի մաս չէ:
Ներկայացուցիչների պալատի խոսնակ Նենսի Փելոսին մամուլի ասուլիսի ժամանակ հայտարարել է, որ Վաշինգտոնը նահանգ դարձնելը կշտկի առկա անարդարությունը:
«Վաղը (հունիսի 26-ին) մենք կշտկենք այդ անարդարությունը, որը հակասում է մեր ժողովրդավարությանը»,-մեջբերում է խոսնակին Fox News հեռուստաալիքը:
Նախաձեռնության հեղինակները դեմոկրատ կոնգրեսականներն են, Փելոսին նույնպես ներկայացնում է Դեմոկրատական կուսակցությունը:
Նրանք պնդում են, որ մայրաքաղաքի բնակիչները բարեխղճորեն կատարում են իրենց քաղաքացիական պարտավորությունները, բայց չեն կարողանում ընտրել իրենց ներկայացուցիչներին դաշնային կոնգրեսում:
Ինչ վերաբերում է օրինագծի հեռանկարին, ապա սպասվում է, որ այն կհաստատվի ստորին պալատում, որտեղ դեմոկրատները մեծամասնություն են կազմում, և կմերժվի Սենատում, որը գտնվում է հանրապետականների հսկողության ներքո: Սպիտակ տանը հայտարարել են, որ ամեն դեպքում օրինագծի նկատմամբ վետո են դնելու:










