Ռուսաստանում Սահմանադրության փոփոխությունների առցանց քվեարկությանը մասնակցել է գրանցված ընտրողների 75%-ը

03:22 • 28.06.20

Ռուսաստանում Սահմանադրության փոփոխությունների առցանց քվեարկությանը մասնակցել է գրանցված ընտրողների 75%-ը, հայտնում է Lenta.ru-ն:

Առցանց քվեարկությանը մասնակցելու համար գրանցված 879 700 ընտրողների մոտ 3/4-ն իր ընտրությունը կատարել է քվեարկության մեկնարկից սկսած 60 ժամվա ընթացքում, իսկ քվեարկության ավարտին 72 ժամից քիչ է մնացել:

Սահմանադրական փոփոխությունների քվեարկությունը Ռուսաստանում մեկնարկել է հունիսի 25-ից և կտևի մինչև հուլիսի 1-ը ներառյալ:

Ռուսաստանի քաղաքացիները պետք է կողմ կամ դեմ քվեարկեն Սահմանադրության մեջ առաջարկվող այնպիսի փոփոխությունների, ինչպիսիք են ռուսական օրենսդրության գերակա դառնալը միջազգայինի նկատմամբ, ՌԴ գործող նախագահին կրկին վերընտրվելու իրավունքն տալն ու պաշտոնավարման նախորդ երկու ժամկետների զրոյացումը: Նշված առաջարկները հավանության են արժանացել Ռուսաստանի Սահմանադրական դատարանի, Պետդումայի, Դաշնային խորհրդի և ռեգիոնալ խորհրդարանների կողմից:

Առցանց քվեարկությանը կարող են մասնակցել Մոսկվայի և Նիժնի Նովգորոդի մարզի բնակիչները: Քվեարկության հիմնական օրը՝ հուլիսի 1-ը, հայտարարվել է ոչ աշխատանքային: