Ղրղզստանի բնակիչները «խոսքի ազատությունը սահմանափակող» օրինագծի դեմ բողոքի ցույցի են դուրս եկել (լուսանկարներ, տեսանյութ)
Ղրղզստանի քաղաքացիները խորհրդարանի հավանությանն արժանացած «Տեղեկատվության մանիպուլյացիայի մասին» օրինագծի դեմ բողոքի ակցիայի են դուրս եկել․ նրանց կարծիքով՝ օրենքի՝ ուժի մեջ մտնելու պարագայում այն կարող է լուրջ վնաս հասցնել խոսքի ազատությանը։ Ցույցի մասնակիցները նախագահ Սոորոնբայ Ժեենբեկովին խնդրում են օրինագծի նկատմամբ վետո կիրառել, գրում է eadaily.com կայքը։
Օրինագծում նշվում է, որ իշխանությունները կարող են մինչդատական կարգով դադարեցնել այն վեբկայքերի աշխատանքը, որոնք կեղծ կամ ոչ հավաստի տեղեկատվություն պարունակող հրապարակումներ կանեն։ Ղրղզստանի քաղաքացիները սա գրաքննություն և խոսքի ազատությանն ուղղված սպառնալիք են համարում։
Խորհրդարանն այս սկանդալային օրինագծին հավանություն է տվել նախորդ շաբաթ՝ հունիսի 25-ին։ Ցույցի մասնակիցները հայտարարում են, որ պատգամավորները քվեարկել են նաև իրենց բացակա գործընկերների փոխարեն, ուստի և պահանջում են նման խախտումներ թույլ տված անձանց պատասխանատվության ենթարկել։
Հավաքվածները երկու դիմում են գրել։ Առաջինն ուղղված է նախագահին, որով պահանջում են փաստաթղթի նկատմամբ վետո սահմանել։ Երկրորդ դիմումը հասցագրված է Ազգային անվտանգության պետական կոմիտեին, դատախազաությանը․ ցուցարարները խնդրում են ստուգել խորհրդարանում օրինագծի քվեարկության օրինականությունը։
Հունիսի 25-ից ի վեր բողոքի ցույցերը՝ լուսանկարներով.













