Սեզոնային աշխատանքի մեկնող Վրաստանի քաղաքացիները կառավարության կողմից 300 լարի օգնություն կստանան

10:58 • 30.06.20

Վրաստանի այն քաղաքացիները, որոնք սեզոնային աշխատանքի են մեկնել արտերկիր, կառավարության կողմից 300 լարի (ավելի քան 47 000 դրամ) օգնություն կստանան: Այս մասին տեղեկացնում է netgazeti.ge կայքը` հղում տալով Վրաստանի առողջապահության և սոցիալական ապահովության փոխնախարար Թամիլա Բարկալաիային:

Փոխնախարարի խոսքերով` Վրաստանում շուրջ 130 000 մարդ իրավունք ունի օգտվել սեզոնային աշխատողներին տրվող օգնությունից:

«Սահմանվել է օգնություն ստացող մարդկանց 2 կատեգորիա. առաջին կատեգորիան ներառում է այն մարդկանց, որոնք ամեն օր հատում են սահմանը և աշխատում Թուրքիայում: Տարվա ընթացքում 60 կամ ավելի անգամ աշխատանքի նպատակով սահմանը հատած անձինք 300 լարի օգնություն կստանան: Երկրորդ կատեգորիայում ներառվել են սեզոնային աշխատողները, որոնք աշխատանքային սեզոններին մեկնել են աշխատելու Թուրքիա կամ այլ երկրներ»,-ասել է Բարկալաիան:

Փոխնախարարը տեղեկացրել է, որ օգնություն ստանալու համար հարկավոր է գրանցվել Առողջապահության նախարարության պորտալում` նշելով անձնական և բանկային տեղեկատվությունը: Գումարը կփոխանցվի գրանցվելուց հետո 10 օրվա ընթացքում:

Նշվում է, որ արտերկրում աշխատող Վրաստանի քաղաքացիների մեծ մասն աշխատում է Թուրքիայում:

Գրանցման վերջնաժամկետը հուլիսի 15-ն է: