Երբ իմացա՝ ԵՊՀ-ում դասաժամեր չեմ ունենալու, դեկանի հետ խոսեցի, սակայն կոշտ պատասխան ստացա․ ասաց՝ ժամերը բաշխելու ենք ներսի աշխատողների միջև. Հարություն Մովսիսյան (տեսանյութ)
Այն հանգամանքը, որ ես որոշակի խնդիրներ տեսնելիս բարձրաձայնում եմ, օգտագործում են որպես առիթ ու փորձում են ինձ Համալսարանում ժամեր չտրամադրել: Այս մասին Tert.am-ի հետ զրույցում նշեց ԵՊՀ ռեգիոնալ երկրաբանության և օգտակար հանածոների հետախուզման ամբիոնի դոցենտ Հարություն Մովսիսյանը՝ ներկայացնելով, որ նոր ուսումնական տարում իրեն այլևս դասաժամեր չեն հատկացվելու: Նշենք, որ Մովսիսյանն արժանացել է «տարվա լավագույն դասախոս» մրցանակին:
«Պատճառաբանում են, թե ես անցել եմ այլ հիմնական աշխատանքի և Համալսարանում համատեղությամբ եմ, ու ժամերի քիչ լինելով պայմանավորված՝ փորձում են ապահովել ներսի աշխատողներին: Բայց այդ մոտեցումն անձնավորված է կիրառվում, ես այլ աշխատանքի անցնելուց պայմանավորվածություն էի ձեռք բերել, որ Համալսարանում ապահովելու եմ իմ որոշակի ժամաքանակը, սակայն դա հաշվի չի առվել և հիմնական պատճառը բերվում է այն, որ ժամեր չկան, սակայն հասկանալի է՝ այստեղ ոչ թե ժամերի խնդիրն է, այլ որոշակի անձնական խնդիրներ են՝ կապված այն բանի հետ, որ եթե ես հարցեր եմ տեսնում, բարձրաձայնում եմ դրանց մասին»,-ասաց նա:
Մովսիսյանի խոսքով՝ իր բարձրաձայնած խնդիրները եղել են կապված ուսումնական գործընթացի հետ և այն խնդիրները, որոնք նա բարձրաձայնել է, շատերին դուր չեն գալիս: Նա նշեց, որ իրեն դասաժամեր չտրամադրելու մասին պաշտոնապես չի ծանուցվել, այդ մասին տեղեկացել է այն ժամանակ, երբ ներկայացվել են ամբիոնային բեռնվածությունները: Ըստ նրա՝ այս ամենի հետևանքով ուսանողները զրկվում են այն ծրագրերը ուսումնասիրելուց, որոնք նա մշակել էր:
«Երբ իմացա, որ Համալսարանում դասաժամեր չեմ ունենալու, և՛ ամբիոնի վարիչի, և՛ դեկանի հետ խոսեցի, սակայն կոշտ պատասխան ստացա՝ այսպես ենք որոշել, այսպես է նպատակահարմար և ժամերը բաշխելու ենք ներսի աշխատողների վրա, եթե հետո ժամեր լինեն, կտանք, բայց բնական է, որ հետո ժամեր չկան և հետագայում նման հույսեր չեն կարող լինել: Սա ցույց է տալիս, որ անհատական մոտեցում է ցուցադրվում և մինչ այդ գործող սկզբունքը, փաստորեն, չի գործում»,- շեշտեց դոցենտը:
Մանրամասները՝ տեսանյութում










