Խուճապն առաջացավ այն ժամանակ, երբ մարդիկ տեսան՝ ինչ է կատարվում աշխարհում, բայց չէին ստանում գիտելիքներ՝ ինչպես պաշտպանվել. համաճարակաբանը՝ կորոնավիրուսի մասին (տեսանյութ)
Եթե անդրադառնանք ՀՀ առողջապահության նախարար Արսեն Թորոսյանի այն պնդմանը, որ կորոնավիրուսի դեմ պայքարում առկա բացթողումները պայմանավորված են կորոնավիրուսի ոչ բավարար ուսումնասիրության հետ, պետք է նշեմ, որ ունենք համաճարակաբանության աքսիոմա՝ եթե վիրուսն ուսումնասիրված չէ և անհայտ է, այն պետք է դիտարկել առավելագույն վտանգավոր, մինչև չապացուցվի հակառակը. այսօր ասուլիս ժամանակ նշեց բժիշկ-համաճարակաբան Էդուարդ Հովհաննիսյանը:
Համաճարակաբանի կարծիքով՝ փետրվարին ԱՀԿ-ի հայտարարության մեջ ասվում էր, որ վիրուսն ունի բավականին մեծ վտանգավորություն, պանդեմիայի վերածվելու բնութագրեր և բարձր մահաբերություն: Նույնիսկ եղել է ցուցում, որ այն չի կարելի համեմատել գրիպի հետ, քանի որ գրիպի վիրուսն ունի պատվաստանյութ և բուժում, մարդկանց իմունային համակարգը ծանոթ է հիվանդությանը: Այսինքը, ըստ բժշկի՝ դեռևս փետրվարին ԱՀԿ-ն տեսնում էր, որ որոշ մասնագետներ փորձում են վիրուսը համեմատել այլ գրիպների հետ:
«Նման դեպքերում պետք է արվեր մաքսիմալ միջոցառումներ: Մարտի սկզբին միտք հնչեց, որ կարանտինն արդյունավետ միջոց չէ, ինֆեկցիոն հիվանդությունների հետ պայքարում, այնինչ կարանտինը համաճարակաբանության մեջ միշտ եղել է արդյունավետ միջոց: Փետրվարին արդեն ԱՀԿ-ից կար տեղեկություն, որ իրավիճակը Իրանում և Իտալիայում մտահոգիչ է: Փետրվարի 28-ին ունենք հստակ հաղորդագրություն, որ Իտալիայից վիրուսը գնացել է արդեն 14 երկիր իսկ Պարսկաստանից 97 վարակակիր գնացել է դեպի 11 երկիր: Փաստորեն, ուշադրություն չի դարձվել այս տեղեկատվությանը և սահմնափակումներ չեն մտցվել»:
Էդուարդ Հովհաննիսյանը նշում է, որ Հայաստանում հայտարարված կարանտինը ոչ արդյունավետ է իրականացվել: Քանի որ համաճարակաբանությունը, որպես գիտություն նշում է, որ նման դեպքերում կարանտինը պետք է մտցվի ամբողջ ուժով և միայն հետագայում իրավիճակը ուսումնասիրելուց հետո կարելի է աստիճանաբար սահմանափակումները թուլացնել:
Ըստ նրա՝ փետրվարին ԱՀԿ-ն խոսել է այն մասին, որ պետք է աշխատանք տարվեր բնակչության հետ: Բնակչությանը տալով լիարժեք ինֆորմացիա, որպեսզի բոլոր շերտերը պաշտպանված լինեն, միաժամանակ չառաջացնելով խուճապ.
«Կարող ենք վերհիշել ՀՀ առողջապահության նախարարի ներկայացրած ինֆորմացիան, արդյո՞ք դա եղել է ամբողջական և բնակչությանը պաշտպանող, սովորեցնող և վարքագիծ մշակող, տրամաբանական է՝ ոչ: Խուճապն այն ժամանակ առաջացավ, երբ մարդիկ տեսնում էին ինչ է կատարվում ամբողջ աշխարհում, բայց չէին ստանում լիարժեք գիտելիքներ, որն իրենց կարող էր պաշտպանել»:
Էդուարդ Հովհաննիսյանը նաև ընդգծեց, որ փետրվարին ԱՀԿ-ն ուղղորդել է մշակել հակահամաճարակային ռազմավարություն, գնահատել բժշկական կարողությունները և մշակել բնակչության հետ հաղորդակցման ռազմավարություն՝ նախապատրաստվելով համաճարակին, ինչը մարտի 6-ին Վրաստանը կատարել է՝ տալով ռազմավարության ամբողջ գնահատականը:
Ըստ մասնագետի՝ մյուս խնդիրը ռազմավարության պլանավորումն էր: Նախարարն ասել էր, որ վիրուսն ունենալու է սեզոնայնություն, և երբ ջերմաստիճանը բարձրանա համաճարակը հետ է զարգանալու, վիրուսի տարածվածույունը նվազելու է: Սակայն դա հակասում է Իտալիայից, Չինաստանից ստացած տեղեկություններին, այն մասին, որ վիրուսը հիմնականում նեղ կոլեկտիվներում փոխանցվող է, այսինքն՝ արտաքին միջավայրը վրան չի ազդում: Ինչպես նաև գոյություն ունի համաճարակաբանության սկզբունք, որ պանդեմիաները չունեն սեզոնայնութուն:










