Սանկտ Պետերբուրգի հիվանդանոցներից մեկից կորոնավիրուսի հակամարմիններով արյան պլազմայի փոխներարկման արդյունքում ապաքինվելուց հետո 60 հիվանդ է դուրս գրվել

18:25 • 04.07.20

Սանկտ Պետերբուրգի հիվանդանոցներից մեկից 60 հիվանդ է դուրս գրվել կորոնավիրուսի հակամարմիններով արյան պլազմայի փոխներարկումից և դրա շնորհիվ ապաքինումից հետո, հայտնում է «Ռիա Նովոստի» գործակալությունը՝ հղում տալով Սանկտ Պետերբուրգի փոխնահանգապետ Օլեգ Էրգաշևի հայտարարությանը։

«Առնվազն 2 ամսվա ընթացքում կյանքի համար վտանգավոր վճակում գտնվող 84 հիվանդի հակակորոնավիրուային պլազմայի 164 չափաբաժին է ներարկվել։ Հիվանդների մոտ դրական միտում է նկատվել։ 60 հիվանդ արդեն դուրս է գրվել հիվանդանոցից»,- ասվում է հաղորդագրության մեջ։

«Կորոնավիրուսի վարակը հաղթահարած հիվանդների հիպերիմունային պլազմայի թերապիան լավ արդյունքներ է ցույց տալիս։ Սա պատվաստանյութի բացակայության պայմաններում կորոնավիրուսի հարուցիչով պայմանավորված հիվանդության բուժման առավել արդյունավետ մեթոդներից է»,- նշել է Էրգաշևը։

Հայտնի է, որ Պետերբուրգում հակակորոնավիրուսային պլազմայի «հավաքը» տեղի է ունեցել մայիսի 7-ին։ Այս ամբողջ ընթացքում քաղաքում հակակորոնավիրուսային պլազմայի 66․9 լիտր քանակություն է պատրաստվել, որն օգտագործվում է ծանր վիճակում գտնվող հիվանդների բուժման համար։