«Որպես զինվորական ասում եմ՝ Ֆահրիզադեի մահն անպատասխան չի մնա». Իրանի պաշտպանության նախարար
Իրանի պաշտպանության նախարար Ամիր Հաթամին հայտարարել է, որ միջուկային ֆիզիկոս, երկրի միջուկային ծրագրի գլխավոր մասնագետ Մոհսեն Ֆահրիզադեի մահն անպատասխան չի մնա, գրում է Reuters գործակալությունը:
«Թշնամին լավ գիտի, և ես՝ որպես զինվորական, ասում եմ, որ ոչ մի հանցագործություն, ոչ մի սպանություն, իրանցի Ժողովրդի նկատմամբ որևէ հիմար արարք առանց պատասխան չի մնալու»,- նշել է նա Թեհրանում սպանված գիտնականի հրաժեշտի արարողության ժամանակ:
Նրա խոսքով՝ գիտնականի սպանության նպատակն Իրանի հասարակությունը պառակտելն է եղել, ինչը, սակայն, դրա հեղինակներին չի հաջողվել:
Հիշեցնենք, որ Ֆահրիզադեն, որին անվանում են Իրանի միջուկային ռումբի ծրագրի «հայր», գնդակահարվել է ուրբաթ օրը՝ նոյեմբերի 27-ին, լուրջ վնասվածքի հետևանքով ավելի ուշ մահացել է հիվանդանոցում: Իրանի պաշտպանության նախարարությունը հաստատել է, որ սպանված գիտնականը գերատեսչությանը կից հետազոտությունների և նորարարությունների կազմակերպության ղեկավարն է եղել և զբաղվել է երկրի դեմ միջաուկային հարվածների պաշտպանությանը վերաբերող հարցերին:
Ինչպես ավելի վաղ հայտնել է Tert.am-ը, հայտնի են դարձել միջուկային գիտնական, Իրանի միջուկային ծրագրի գլխավոր մասնագետ Մոհսեն Ֆահրիզադեի սպանության մանրակրկիտ գործողության մանրամասները՝ այս երկրի ղեկավարության կողմից պնդումների ֆոնին, որ սպանության ետևում կանգնած է Իսրայելը:
Նշվում է, որ մահափորձի վերջին փուլում ներգրավված է եղել 12 գործակալ, որոնց Ահվազեն անվանում է «բարձր որակավորում ունեցող մարդասպաններ»: Զինյալները, որոնց շարքերում 2 դիպուկահար կար, կազմում էին 62 հոգանոց դավադիր խմբի մի մասը: Իրանցի լրագրողը նշում է, որ մնացած 50 հոգին պատասխանատու էին նյութատեխնիկական ապահովման համար:
Ֆահրիզադեի մեքենայի վրա հարձակումը տեղի է ունեցել Թեհրանից 80 կմ հյուսիս-արևելք գտնվող Աբսարդ քաղաքի մոտակայքում: Հարձակումը պլանավորված է եղել օղակաձև ճանապարհի մոտակայքում ՝ քաղաք տանող խիտ անտառածածկ բուլվարի ներքևի հատվածում:










