Իրանցի միջուկայնագետի սպանության գործում ներգրավված անհատների ինքնությունը պարզվել է. Իրանի կառավարության խոսնակ

19:06 • 02.12.20

Իրանի կառավարության խոսնակ Ալի Ռաբիին հայտարարել է, որ երկրի հետախուզության նախարարությունը պարզել է իրանցի ֆիզիկոս-միջուկայնագետ Մոհսեն Ֆախրիզադեի սպանությանը ներգրավված անհատների ինքնությունը:

Ինչպես փոխանցում է «Մեհր» գործակալությունը, կառավարության խոսնակը նշել է, որ համապատասխան միջոցներ կձեռնարկվեն, երբ հետաքննությունն ավարտվի:

Վերջինս հավելել է, որ Իրանի գիտելիքները միջուկային ասպարեզում չեն պակասի նման ահաբեկչական գործողությունների պատճառով:

Հիշեցնենք, որ Իրանի միջուկային ծրագրի գլխավոր մասնագետ Մոհսեն Ֆախրիզադեն, որը ղեկավարում էր երկրի պաշտպանության նախարարությանը կից ուսումնասիրությունների և նորարարությունների կենտրոնը, սպանվել է նոյեմբերի 27-ին: Վնասվածք ստանալով իր դեմ իրականացված հարձակման ժամանակ՝ գիտնականը մահացել է հիվանդանոցում: