Մալիում տեղի ունեցած հարձակման հետևանքով զոհվել է ՄԱԿ-ի մեկ խաղաղապահ, ևս մեկը վիրավորվել է

01:40 • 16.01.21

Մալիի հյուսիս-արևելքում տեղի ունեցած հարձակման հետևանքով զոհվել է ՄԱԿ-ի մեկ խաղաղապահ, ևս մեկը վիրավորվել է: Այս մասին հայտնում է РИА Новости-ն՝ հղում տալով Մալիում ՄԱԿ-ի առաքելության զորակազմի (MINUSMA) կայքում տեղադրված հաղորդագրությանը:

Ըստ կայքի՝ դեպքը տեղի է ունեցել հունվարի 15-ին՝ տեղի ժամանակով 15:00-ին (Երևանի ժամանակով 19.00-ին), երկրի հյուսիս-արևելքում գտնվող Կիդալ նահանգի Տեսալի քաղաքի շրջակայքում:

Նշվում է, որ այս շաբաթվա սկզբին մեկ այլ միջադեպ էր տեղի ունեցել Մալիի Տիմբուկտու շրջանում: Այդ ժամանակ կազմակերպության ավտոշարասյան վրա հարձակման հետևանքով զոհվել էին ՄԱԿ-ի չորս խաղաղապահներ: 

Հաղորդագրության մեջ հստակեցվում է, որ նոր միջադեպի ժամանակ ռումբի գործադրմամբ հարձակում է կատարվել առաքելության ավտոցիստեռնի վրա, որը ներառված է եղել նյութատեխնիկական ապահովման կազմում: