Հեռուստա և ռադիոալիքների հեռարձակումը դադարել էր. ՀՀՌՑ և ԲՏԱՆ պարզաբանումը

21:48 • 23.06.22

Երևանյան փոթորկից հետո գործող ռադիոալիքներում տեխնիկական խնդիրներ են առաջացել, ինչի հետևանքով ռադիոհեռարձակումները դադարել են։

Մոտ երկու ժամ Երևանում ռադիոալիքները չեն հեռարձակվել, ինչի վերաբերյալ Tert.am-ը պարզաբանում խնդրեց Հայաստանի հեռուստատեսային և ռադիոհաղորդիչ ցանցից, որտեղից հայտնեցին. «Էլեկտրաէներգիայի անջատման պատճառով առաջացել են տեխնիկական խնդիրներ, որոնք այս պահին վերացվել են»:

Հունիսի 23-ի երեկոյան Հայաստանում հեռուստաալիքների հեռարձակման խափանում էր տեղի ունեցել:  «Արմենպրես»-ի հավաստի աղբյուրների տեղեկացմամբ՝ այն տեղի էր ունեցել հեռուստաաշտարակի հոսանքազրկման պատճառով:

Հոսանքազրկվել էր ամբողջ հանրային մուլտիպլեքսը և այն ռադիոընկերությունները, որոնց ալեհավաքները գտնվում  են հեռուստաաշտարակում:

Այս պահին հեռարձակումը վերականգնվել է:

ՀՀ բարձր տեխնոլոգիական արդյունաբերության նախարարությունից էլ հայտնում են, որ եղանակային պատճառներով պայմանավորված՝ էլեկտրականության սնուցման խափանման հետևանքով Հայաստանի ամբողջ տարածքում կարճ ժամանակով դադարեցվել էր հեռուստատեսային և ռադիո հեռարձակումը:

Կատարված վթարավերականգնողական աշխատանքների արդյունքում հեռարձակումը
վերականգնվել է։