Շոյգուն կոչ է արել շտապ ուժեղացնել Միութենական պետության պաշտպանունակությունը

18:29 • 23.06.22

Մոսկվան և Մինսկը պետք է հրատապ միջոցներ ձեռնարկեն Միութենական պետության պաշտպանունակությունն ուժեղացնելու համար։ Նման կոչով է հանդես եկել ՌԴ պաշտպանության նախարար Սերգեյ Շոյգուն՝ Բելառուսի իր պաշտոնակից Վիկտոր Խրենինի հետ հանդիպման ժամանակ, փոխանցում է «Ինտերֆաքս»-ը։

Մոսկվայում կայացած հանդիպման ժամանակ ռուս նախարարն ընդգծել է, որ ներկա պայմաններում այդ հարցը գնալով ավելի արդիական է դառնում։

«Հանգամանքները թելադրում են հրատապ համատեղ միջոցներ ձեռնարկել Միութենական պետության պաշտպանունակության ամրապնդման, զորքերի (ուժերի) տարածաշրջանային խմբավորման մարտունակության և ՀՕՊ միասնական տարածաշրջանային համակարգի մարտունակության բարձրացման համար»,- ասել է Շոյգուն։

Նա վստահեցրել է, որ Ռուսաստանը պատրաստ է «բելառուս ընկերներին» ցուցաբերել ցանկացած աջակցություն այս խնդրի լուծման համար։

Փետրվարին Մոսկվան և Մինսկը Բելառուսի տարածքում համատեղ զորավարժություններ են անցկացրել։