Ազգային խոհանոց, բերքուբարիք, երգ ու պար. կայացավ «Ջան աշուն» փառատոնը՝ «Երեմյան» ընկերությունների խմբի նախաձեռնությամբ (տեսանյութ, լուսանկարներ)

Աշնանային բերքուբարիք, ազգային խոհանոց, երաժշտություն ու տոնական տրամադրություն՝ մայրաքաղաքի կենտրոնում. «Սիզընս» այգում տեղի ունեցավ «Երեմյան» ընկերությունների խմբի կողմից կազմակերպված «Ջան աշուն» փառատոնը:

Փառատոնին իրենց յուրօրինակ ձեռագրով ներկայացան 40 ընկերություն՝ տեղական արտադրողներ, մշակութային կառույցներ, ժամանցային ընկերություններ։ Առանձնահատուկ ներկայացվածություն ունեին «Երեմյան» ընկերությունների խմբի «Պանդոկ Երևան» ռեստորանային ցանցը՝ իր 20-ամյա պատմությամբ, և «Երեմյան» կաթնամթերքը՝ ավելի քան 60 տեսակի բնական արտադրանքով։

««Ջան աշուն» փառատոնը, «Երեմյան» ընկերությունների խմբի 20-ամյակին նվիրված միջոցառումների շրջանակում իրականացվող աշնանային միջոցառում է՝ նվիրված քաղաքի բնակիչներին, ինչպես նաև քաղաքի հյուրերին։ Այս փառատոնն իրականացվում է մեր կողմից,  առաջին անգամ և այն ստեղծվել է համախմբելու ազգային խոհանոցը, ինչպես նաև մշակույթը, երգն ու պարը, բերքուբարիքը, որով մենք հպարտանում ենք»,-ասում է «Երեմյան» ընկերությունների խմբի Մարքեթինգի և հաղորդակցության տնօրեն Լուսինե Երեմյանը։

Հյուրընկալության ոլորտի ակունքներում կանգնած «Պանդոկ Երևան»-ը փառատոնի ընթացքում կազմակերպեց հայկական լավաշի, ղափամայի, հարիսայի, գաթայի տեղում պատրաստում և հյուրասիրություն, ցուցադրություններ, ազգային երգուպարի համերգներ: Ի դեպ, «Պանդոկ Երևան»-ի խոհարարների կողմից, գործունեության 20 տարվա ընթացքում վերհանվել և հայկական խոհանոց է ներմուծվել 200-ից ավելի ազգային ուտեստ:

«Մենք ուրախ ենք այդ փաստով և հպարտանում ենք, քանի որ այդ ուտեստները մատուցվում են ոչ միայն մեր ռեստորաններում, այլև դուրս են եկել «Պանդոկ Երևան»-ի դռներից և ազգային խոհանոցը ներկայացնող այլ ռեստորաններ նույնպես դրանք հաճույքով մատուցում են: Դա, ըստ էության, վկայում է այն մասին, որ էկոհամակարգի զարգացման գործում «Երեմյան» ընկերությունների խումբը իր փոքր, բայց կարևոր դերակատարումն ունեցել է»-նշում է Լուսինե Երեմյանը։

Փառատոնի ընթացքում մասնակիցները հնարավորություն ունեցան ոչ միայն ճաշակելու ներկայացված ուտեստները, այլև անցկացնելու ընտանեկան հաճելի ժամանց՝ կենդանի երաժշտությամբ և համերգային ծրագրերով, խոհարարական վարպետության և  ստեղծագործական դասընթացների միջոցով:

«Ջան աշուն» փառատոնի ընթացքում տեղի ունեցավ նաև հայկական տարազների ցուցադրություն՝ Տերյան մշակութային կենտրոնի հետ համագործակցությամբ: 

«Տերյան մշակութային կենտրոնն ավելի քան 20 տարի է՝ զբաղվում է ազգային հագուստների վերականգնմամբ և ստեղծմամբ՝ հիմքում ունենալով մ ազգային մշակույթի դետալները: Մենք, մեր հագուստների մեջ օգտագործում ենք ոչ միայն թանգարանային նմուշների հագուստների կերպարները, այլև գորգանախշերն ու նախշազարդերը»,-ընդգծում է Տերյան մշակութային կենտրոնի ներկայացուցիչ Նարե Զաքարյանը:

Այսպիսով, «Ջան աշուն»-ը համախմբեց մայրաքաղաքի բնակիչներին ու հյուրերին՝ երկու օր շարունակ ներկայացնելով հայկական մշակույթի, խոհանոցի ու ստեղծագործական ժառանգության բազմազանությունը՝ ազգային ավանդույթները դարձնելով փառատոնի գլխավոր շեշտադրում։