Վիետնամցի դպրոցականներին կհեռացնեն ինտերնետ սրճարաններից

Վիետնամի մայրաքաղաք Հանոյում արգելք է սահմանվել դպրոցների և այլ ուսումնական հաստատությունների մոտ ինտերնետ սրճարանների բացման համար։ Ինչպես հայտնում է AFP-ն, դպրոցներից 200 մետրից մոտ հեռավորությամբ գտնվող ինտերնետ սրճարանները մեկ ամսում պետք է դադարեցնեն իրենց աշխատանքը։

Այդ հաստատությունները նաև չեն կարող այցելուներին տրամադրել ինտերնետ մուտք գործելու հնարավորության երեկոյան ժամը 11-ից մինչև առավոտյան ժամը 6-ը։ Որպես արգելքի հիմնական նպատակ նշվում է օնլայն խաղերի նկատմամբ դեռահասների բուռն հակման դեմ պայքարը, քանի որ այդ մոլուցքի պատճառով նրանք թողնում են ուսումը։

Ինտերնետ սրճարանների նկատմամբ վիետնամական իշխանության ձեռնարկած միջոցներից մեկն էլ պոռնոգրաֆիական նյութերը և այլ բովանդակությունները ֆիլտրող ծրագրային ապահովման պարտադիր գործածումն է։

Նշենք, որ ինտերնետ գրաքննության պատճառով Վիետնամը պարբերաբար քննադատության է ենթարկվում։ Մասնավորապես, Google-ը Վիետնամը դասել է այն 25 երկրների շարքին, որտեղ իշխանությունները քաղաքական կամ այլ գրաքննության նկատառումով արգելափակում են մատչումը ընկերությունների ծառայություններին։ Վիետնամը նաև «Լրագրողներ առանց սահմանների» կազմակերպության «ինտերնետի թշնամիների» ցուցակում է։