Mozilla-ն և Samsung-ը նոր բրաուզեր կստեղծեն

Firefox բրաուզերի հեղինակ Mozzilla-ն և Samsung ընկերությունը հայտարարել են, որ սկսել են աշխատանքներ կատարել Servo անունը կրող նոր սերնդի բրաուզերի շուրջ: Այս մասին պաշտոնական բլոգում հայտնել է Mozilla-ի տեխնիկական տնօրեն Բրենդան Էյհը, գրում է Lenta.ru-ն:

Ծրագրի նպատակն է ստեղծել հարթակ, որը կկարողանա օգտագործել «արագ, բազմամիջուկ, հետերոգեն համակարգչային ճարտարապետությունների» և զուգահեռ հաշվարկող համակարգերի առավելությունները՝ պահպանելով անվտանգության նկատառումները:

Հարթակը ստեղծվում է «զրոյից»: Կոօգտագործվի  Rust ծրագրավորման լեզուն, որը ստեղծվել էր Mozilla-ում ու մինչև այժմ գտնվում էր ստեղծման փուլում:

Servo-ն առաջին հերթին նախատեսված է ARM պրոցեսորներով սարքերի համար, որոնք աշխատում են Android համակարգով: Նման սարքեր է արտադրում Samsung-ը:

Բրաուզերի ստեղծման ժամկետները դեռևս հայտնի չեն: Հիշեցնենք, որ Mozilla-ն Servo-ի ստեղծման վրա աշխատում էր 2012 թվականից: