Ճաղատացումը սրտային հիվանդության նախանշաններից մեկն է. ճապոնացի մասնագետներ

Ճապոնացի գիտնականները պարզել են, որ տղամարդիկ, որոնց մազերը թափվում են, ավելի շատ են հակված սրտանոթային հիվանդություններին, քան նրանք, ովքեր խնդիրներ չունեն մազաթափության հետ, գրում է Russia Today-ը։

Ճապոնացիներն ուսումնասիրել են 37 հազ. տղամարդու տվյալ և եզրակացության հանգել, որ ճաղատացող տղամարդիկ ավելի թույլ սիրտ ունեն։ Սրտի իշեմիկ հիվանդության առաջացման ռիսկը նրանց մոտ 32%-ով բարձր է։ Սակայն դա ամենալուրջ գործոնը չէ նման հիվանդություն ձեռք բերելու համար. ծխելը և ավելորդ քաշն ավելի վտանգավոր պատճառներ են։

Տղամարդկանց մոտ կեսը կորցնում է մազերը 50 տարեկանին մոտ, իսկ 70 տարեկանում ճաղատանում է նրանց 80%-ը։ Վաղ տարիքում նոսրացող մազածածկույթը վկայում է սրտի վատ աշխատանքի մասին։

Ճապոնացիները խորհուրդ են տալիս բոլոր նրանց, ովքեր երիտասարդ տարիքում իրենց մոտ նկատում են մազաթափություն, հրաժարվել վատ սովորույթներից և կարգավորել քաշը։

Ճաղատացումը սրտի իշեմիկ հիվանդության զարգացման ըստ կարևորության 3-րդ գործոնն է՝ ժառանգականությունից և տարիքային փոփոխություններից հետո։

Սակայն բժիշկները հորդորում են շատ չանհանգստանալ. եթե մազերը թափվում են, դա դեռ 100 տոկոսով չի նշականում, որ ժամանակն է դիմել սրտաբանի։

«Թեև ճապոնացի բժիշկների հետազոտությունը համոզիչ է, ես ամեն դեպքում խորհուրդ չեմ տա չափազանց շատ անհանգստանալ մազաթափության առաջին նախանշանների դեպքում։ Վերջնական եզրակացություն անելու համար անհրաժեշտ է հետևել կազմվածքին. գիրացումն ավելի սպառնացող գործոն է, քան ճաղատացումը»,- ասում է British Heart Foundation-ից սրտաբան Դորիան Մեդոքը։