Բրիտանացի գիտնականներին չի հաջողվել զգայախաբություն առաջացնող սնկերն օգտագործել ընկճախտի դեմ

Բրիտանացի գիտնականները 650 հազար եվրո են ստացել Բժշկական հետազոտությունների կենտրոնից, որպեսզի երեք տարվա ընթացքում ուսումնասիրեն դեպրեսիայի բուժման մեթոդներն այնպիսի հիվանդների համար, որոնց չեն օգնում դեղերի մեծամասնությունը։

Ինչպես տեղեկացնում է Russia Today-ը, բժիշկները, ովքեր բացահայտել էին, որ զգայախաբություն առաջացնող սնկերում պարունակվող պսիլոցիբինն օգնում է դեպրեսիայի դեմ պայքարում, այնուամենայնիվ անգամ չեն կարողացել փորձարկումներ կատարել։ «Մենք չգտանք որևէ ընկերություն, որը կարողանար արտադրել նման նյութ՝ բյուրոկրատական խոչընդոտները հաղթահարելով արտոնագիր ստանալուց հետո»,-ասել է նախագծի հեղինակ, պրոֆեսոր Դևիդ Նութը։

Նրա թիմը բացահայտել էր, որ  հալյուցինացիա առաջացնող սնկերի պսիլոցիբին նյութն անջատում է ուղեղի մի մասը։ Հենց դա է ակտիվ այն մարդկանց մոտ, ովքեր ընկճախտով են տառապում։

Փորձը ցույց է տալիս, որ հիվանդները, ովքեր պսիլոցիբին են օգտագործում, իրենց ավելի լավ և երջանիկ են զգում, չնայած այլ ցանկացած բուժում նրանց չէր թեթևացնում։

Վերջնական եզրակացություններ անելու համար գիտնականները պետք է երեք տարի հետևեն 60 հիվանդների։

Սակայն դեպրեսիայի հակաթույնի ստեղծման գյուտին խոչընդոտել է եվրոպական և բրիտանական բյուրոկրատիան։

Որպեսզի նման ակտիվ նյութ ստեղծվի թմրանյութերից, անհրաժեշտ է արտոնագիր, որի արժեքը հասնում է 100.000 եվրոյի։ Դա գիտնականների համար պսիլոցիբին ստանալը գրեթե անհնար է դարձրել։