Ստեղծվել է պայթյունից պաշտպանող մեջքի պայուսակ (լուսանկարներ)

Նորաստեղծ մեջքի պայուսակն իր նորարարությունների շնորհիվ կարող է փրկել մարդու կյանքը՝ պաշտպանելով նրա կենսական օրգանները, գրում է Daily Mail-ը:

Չնայած պայուսակը չի պաշտպանում մարդու վերջույթները, այնուամենայնիվ, 27-ամյա դիզայներ Հիլա Րաամը նպատակ ունի իր նորարարական ապրանքով գրավել Իսրայելի շուկան:

Նրա խոսքով՝ պայուսակը մշակված է այնպես, որ ապաստան դառնա արտակարգ դրության կամ ահաբեկչական հարձակման ժամանակ:

Պայուսակի տերը պետք է քաշի կողքի գոտիները և գլխանոցի դեղին թելերը, եթե լսում է տագնապի ազդանշանը, և պառկի հատակին: Մոտ 470 դոլար արժողությամբ պայուսակն ամբողջովին կպաշտպանի մարդու գլուխը, սիրտը, լյարդը և երիկամները պայթյունից:

«Սա սովորական պայուսակ չէ, այն կարող է կյանքեր փրկել: Ի սկզբանե այն նախատեսված էր երեխաների համար, բայց կարող է նաև օգտագործվել մեծահասակների կողմից, քանի որ ունենալու է դիզայնի փոփոխություններ: Ես ցանկանում էի պաշտպանել մարդկանց, երբ նրանք բաց տարածություններում են և չեն կարողանում սահմանափակ ժամանակահատվածում ապաստան գտնել»,- ասել է դիզայները: