Գիտնականները Գրենլանդիայում սառցաշերտի տակ 750 կմ երկարությամբ կիրճ են հայտնաբերել (լուսանկար)

19:35 • 30.08.13

Բրիսթոլի համալսարանի (Միացյալ Թագավորություն) գիտնականները Գրենլանդիայի սառույցի շերտի տակ հսկայական կիրճ են հայտնաբերել, ասվում է Science ամսագրում հրապարակված հոդվածում, տեղեկացնում է ABC.es-ը:

Կիրճի երկարությունը հասնում է 750 կմ-ի, իսկ որոշ գոտիներում այն ունի 800 մետր խորություն, որը հավասար է ԱՄՆ-ի Արիզոնա նահանգի «Մեծ կանյոնի» որոշ հատվածների խորությանը:

Գիտնականները կարծում են, որ կիրճը առաջացել է նախքան Գրենլանդիայի՝ սառցաշերտով պատվելը միլիոնավոր տարիներ առաջ, և այն ունի գետային հոսքի հետքեր:

Գիտնականներին հաջողվել է ուսումնասիրել հեռավոր կղզու սառցաշերտի տակ գտնվող համակարգը՝ օգտվելով ՆԱՍԱ-ի օդային ռադարների տվյալներից: