ԵՄ-ի հետ համագործակցության 15 պայմանագիր ստորագրվեց
Հայաստանի հետ Եվրոպական միության համագործակցության 15 պայմանագիր ստորագրվեց այսօր։ Պայմանագրերը կիրականացվեն երկկողմ և տարածաշրջանային համագործակցության տարբեր ուղղություններով՝ ներառյալ գյուղատնտեսությունն ու գյուղական համայնքների կառավարումը, մարդու իրավունքներն ու ժողովրդավարությունը, աղքատության կրճատումն ու քաղաքաշինության կայուն զարգացումը:
Ընդհանուր 10 մլն եվրո բյուջե է նախատեսված: Ստորագրման արարողությանը ողջույնի խոսքով հանդես եկավ Հայաստանում Եվրամիության պատվիրակության ղեկավար, դեսպան Տրայան Հրիսթեան՝ նշելով, որ ԵՄ-ն հաձնառու է խորացնել հարաբերությունները Հայաստանի հետ և պատրաստ է ամրապնդել երկկողմ համագործակցությունը ընդհանուր արժեքների վրա հիմնված համատեղ հետաքրքրության ուղղություններով:
ԵՄ ֆինանսավորման այլ նախաձեռնությունների միջոցով տեխնիկական աջակցություն կտրամադրվի գյուղատնտեսության և գյուղական համայնքների բարեփոխումներին, սկսնակ և գործող արտադրական խմբերի ամրապնդմանն ու Գյուղատնտեսության նախարարության ինստիտուցիոնալ զարգացմանը: Դրանք կնպաստեն գյուղատնտեսության և գյուղական համայնքների զարգացմանն ուղղված ԵՄ ոլորտային ծրագրի իրականացմանը:
Նոր պայմանագրերից չորսը միտված են աղքատության կրճատմանն ու կայուն զարգացմանը, որը կիրականացվի ոչ պետական դերակատարների և տեղական մարմինների միջոցով:










