Charlie Hebdo-ն Ֆրանսիայում կտպագրվի 5 մլն օրինակով՝ պահանջարկը բավարարելու համար (լուսանկարներ)
Ֆրանսիական Charlie Hebdo երգիծական շաբաթաթերթի նոր համարը կտպագրվի 5 միլիոն օրինակով։ Նման որոշում է կայացվել չորեքշաբթի վաճառքի հանված նոր համարի հսկայական պահանջարկի պատճառով, հաղորդում է Agence France-Presse-ը՝ վկայակոչելով դիստրիբյուտորներին:
«Խմբագիրը որոշել է այս առավոտյան ավելացնել տպաքանակը մինչև հինգ միլիոն»,- ասել է MLP մամուլի բաշխման ընկերության ղեկավար Վերոնիք Ֆաժուրը: Դա նշանակում է նախապես նախատեսված երեք միլիոն տպաքանակից երկու միլիոնով ավելի:
«Դա անհավատալի էր: Ինձ մոտ 60-70 մարդ հերթ էր կանգնել՝ սպասելով խանութի բացմանը: Ես նման բան չեմ տեսել: Իմ բոլոր 450 օրինակները վաճառվել են 15 րոպեի ընթացքում»,- ասել է Փարիզում թերթի կրպակում աշխատող կինը:
Նոր համարի շապիկին պատկերված է Մուհամեդ մարգարեի ծաղրանկարը՝ «Ամեն ինչ ներված է» գրության տակ՝ ձեռքին «Ես Շարլի եմ» պաստառով:
Շաբաթաթերթը տպագրվել է 3 միլիոն տպաքանակով, որի եկամուտը կուղղվի խմբագրությունում անցած շաբաթ կատարված ահաբեկչության հետևանքով զոհերի ընտանիքներին:Նախկինում շաբաթաթերթի տպաքանակը եղել է 60 000:















