«Չորս սերնդի պահանջը». նախագիծ՝ Ցեղասպանության 100-րդ տարելիցին ընդառաջ
Հայոց ցեղասպանության 100-րդ տարելիցին ընդառաջ ստեղծվել է «Չորս սերնդի պահանջը» նախագիծը՝ Արարատյան հայրապետական թեմի երիտասարդական կառույցների նախաձեռնությամբ. այս մասին հայտարարվեց «Չորս սերնդի պահանջը» խորագրով ասուլիսին, որը սկսվեց «Հայ մեր»-ով:
«Ցանկացած հայ, հայորդի, որը մի փոքրիկ հայրենասիրություն ունի իր մեջ, իսկ Ցեղասպանությունը բոլորիս ընտանիքների միջով է անցել, սա նաև ես համարում եմ և՛ որպես պատվի հարց, հայ մարդու, հայ երիտասարդի, և հույս ունեմ, որ հաջողություն կունենա»,- ներկայացրեց Տ. Պետրոս ավագ քահանա Մալյանը, ով Արարատյան հայրապետական թեմի երիտասարդական կառույցների ներկայացրած ծրագիրը փոխանցել է Արարատյան հայրապետական թեմի առաջնորդական փոխանորդ, գերաշնորհ տեր Նավասար սրբազանին և ստացել նրա օրհնությունը:
Յուրաքանչյուր ամսվա 24-ին նրանք որևէ թեմատիկ միջոցառում են իրականացնում:
«Ազգային առաջնորդության ինստիտուտի ֆիլմեր» հասարակական կազմակերպության ծրագրերի պատասխանատու Նինա Խաչատրյանը նշեց, որ 4 հոլովակ է նկարահանվել՝ 4 սերնդի ներկայացուցիչների հավաքական կերպարները մարմնավորող անձանցով, ովքեր իրենց պահանջը կներկայացնեն աշխարհին և «հատկապես Թուրքիային՝ դատապարտելու, ճանաչելու և հատուցելու»:
Իսկ 4 սերունդը ընտրված է այն հաշվարկով, որ միասին կազմում են մեկ դար՝ 100 տարի, բացի այդ, 4 թիվը խորհրդանշական է՝ մի կողմից ներկայացնում է խաչի 4 թևերը, աշխարհի 4 ծագերը:
Այլ խոսքով, որ աշխարհի 4 ծագերում հայ մարդիկ հիշում են և պահանջում:










