Մեր կյանքը հույսով լցվեց. իրանցիները տոնել են երկար սպասված միջուկային համաձայնությունը (լուսանկարներ)

13:46 • 03.04.15

Լոզանում երեկ լուծում է ստացել վերջին տարիներին միջազգային քաղաքական օրակարգի ամենահրատապ խնդիրներից մեկը` Իրանի վիճահարույց միջուկային ծրագրի շուրջ երկարատև բանակցություններն ավարտվել են:

 

Ինչպես նշում է theguardian.com-ը, Շվեյցարիայից ստացված բարի լուրն այնքան է ուրախացրել շարքային իրանցիներին, որ նրանք չեն կարողացել զսպել իրենց հուզմունքն ու տոն են կազմակերպել Թեհրանի փողոցներում:

 

Բրիտանական պարբերականը նկատում է, որ իրանցիներին ուրախացրել է այն փաստը, որ արևմտյան պատժամիջոցները վերջապես կչեղարկվեն, իսկ պատերազմի սպառնալիքը կվերանա:

 

«Մեր սրտերը կրկին լցվեցին հույսով: Այժմ մենք մեկուսացված չենք լինի արտաքին աշխարհից, ու տնտեսական դժվարությունները կմնան անցյալում»,-իր ուրախությունն է հայտնել իրանցիներից մեկը:

 

Աղբյուրը մանրամասնում է, որ միջուկային խնդրի լուծման վերաբերյալ տեղեկության տարածվելուն պես Թեհրանի ամենաերկար փողոցը լցվել է մեքենաներով, որոնց պատուհաններից դուրս եկած կանայք ու տղամարդիկ ծածանել են ազգային դրոշը:

 

Ինչպես ավելի վաղ հայտնել էր Тert.am-ը, Իրանի արտաքին քաղաքական գերատեսչության ղեկավար Մոհամմադ Ջավադ Զարիֆը բանակցությունների լիագումար նիստի ավարտից հետո Twitter-ի իր էջում գրել է. «Իրանի միջուկային ծրագրի հարցերով լուծումները գտնված են: Կարելի է անմիջապես սկսել աշխատանքը համաձայնության նախագծի շուրջ»:

 

Այնուհետև Իրանի արտգործնախարար Զարիֆը, ԱՄՆ-ի պետքարտուղար Ջոն Քերին և ԵՄ-ի արտաքին քաղաքականության հանձնակատար Ֆեդերիկա Մոգերինին հանդես են եկել համատեղ հայտարարությամբ:

 

Նրանք, մասնավորապես, ասել են, որ կողմերը ժամանակավոր քաղաքական համաձայնության են եկել, իսկ համապատասխան համաձայնագրի պատրաստումը կպահանջի 3 ամիս:


 

Women flash the "V for Victory" sign as they celebrate on Valiasr street in northern Tehran after the announcement of an agreement on Iran nuclear talks.

People flash the “V for Victory” sign as they celebrate on Valiasr street in northern Tehran.