Կրեմլում չեն մեկնաբանում Պորոշենկոյի` Դոնբասի մասին հայտարարությունը
Կրեմլը չի մեկնաբանում լրատվամիջոցներում հայտնված տեղեկությունը, թե ՌԴ նախագահ Վլադիմիր Պուտինը պատմել է այն մասին, որ Ուկրաինայի նախագահ Պյոտր Պորոշենկոն առաջարկել է իրեն «վերցնել Դոնբասը», գրում է РИА Новости-ն։
«Այնքան էլ լավ չէ, որ այդ միջոցառման որոշ մասնակիցներ պատմել են նախագահի հետ իրենց շփման բովանդակության մասին։ Թող դա մնա նրանց խղճին, պատմել են նրանք ճշմարտությունը, թե ոչ, թող մնա իրենց խղճին։ Ես ոչ մի կերպ չեմ պատրաստվում մեկնաբանել դա»,- ասել է ՌԴ նախագահի մամուլի խոսնակ Դմիտրի Պեսկովը։
Պեսկովն այսպես է պատասխանել Forbes ամսագրի ռուսական ծառայության հրապարակմանն այն մասին, որ Արդյունաբերողների և ձեռնարկատերերի ռուսական միության ղեկավարության հետ փակ հանդիպման ժամանակ Պուտինը պատմել է, թե Պորոշենկոն առաջարկել է Ռուսաստանին «վերցնել Դոնբասը»։
«Միանգամից կպատմեմ, որ Forbes-ն ընդգծել է, որ դա եղել է նիստի փակ մասի ժամանակ, իսկ մենք երբեք չենք մեկնաբանում փակ շփումները»,- ասել է Պեսկովը։










