Հայերի կորցրած տարածքների վերադարձը չպետք է դիտարկել որպես աբսուրդ ենթադրություն. Հենրի Թերիոն

16:43 • 22.04.15

2015 թվականը Ցեղասպանության վերաբերյալ իրազեկման բարձրացման տարի է: Այս մասին այսօր  «Ընդդեմ Ցեղասպանության հանցագործության» միջազգային ֆորումի ժամանակ ասաց զեկուցող Հենրի Թերիոն և նշեց, որ ժխտողականության քաղաքականությունը աշխատում է դրա դեմ:


Ըստ նրա՝ արդար բանակցություններ կլինեն այն դեպքում, երբ  արդարացի փոխհատուցում կտրվի: «Հողերը, գումարը, բանկային հաշիվները վերցվել են հայերից, զանգվածային բռնագրավումը հասել է նույնիսկ կենցաղային իրերի, կահույքի առգրավմանը»,- ասաց նա և նշեց, ըստ որոշ դիտարկումերի՝ հայկական գույքով է ստեղծվել թուրքական հանրապետության տնտեսությունը, այսինքն՝ թուրքական պետությունը ստեղծվել է հայկական ունեցվածքի հիման վրա,  իսկ հազարավոր հայեր զրկվել են ամեն ինչից և մատնվել աղքատության:


«Ցեղասպանությունից թուրքերը օգուտ են ստացել,  ինչը հնարավորություն է  տվել իրենց բարգավաճել»,- ասաց և նշեց, որ տարբեր գնահատականներով, եթե Ցեղասպանություն չլիներ, հայերն այսօր քսանմիլիոնանոց բնակչություն կունենային: Նա նշեց, որ պետք է դիտարկել, որ հայերը ստիպված են ապրել բռնի պայմաններում և մշտական վտանգի տակ: 

 

«Առավել քան կարևոր է հասնել արդարացի հատուցմանը: 1915 թվականի Ցեղասպանությունը չպետք է շարունակվի 2015 թվականին, դեռ շուտ է փակել Ցեղասպանության էջը»,- ասաց նա։


Հենրի Թերիոն հայտնեց, որ փոխհատուցումը վերաբերում է հայությանը՝ որպես խմբի, ոչ թե առանձին վերցրած անձերի, թեև վերջիններս ևս կարող են  իրենց պահանջները ներկայացնել:


«Պետք է շեշտը դնել հավաքական փոխհատուցման վրա: Տարածքային պահանջները, որպես կանոն, նուրբ խնդիր են: Լայն տարածքների վերադարձը չպետք է դիտարկել որպես աբսուրդ ենթադրություն»,- ասաց նա, ապա շարունակեց. «Այսօրվա Թուրքան պետք է վերականգնի այն վնասը, որը տվել 100 տարի առաջ հայերին:  Հատուցումը անհնար չէ, Ցեղասպանությունն այսօրով դառնում է բեռ ոչ միայն հայերի, այլ Թուրքիայի համար, և նրանք բարոյական պատասխանատվություն են կրում։ Եվ եթե սա որոշակի զոհողություն է պահանջում Թուրքիայից, ապա դա արդարացի է»: