Եղանակն՝ այսօր
Այն քաղաքականությունը, որ իրականացնում էինք պատերազմը կանխելու համար, հանգեցրեց հենց պատերազմի. Արա Պապյան
«Մոդուս Վիվենդի» կենտրոնի ղեկավար Արա Պապյանն, այսօր մամուլի ասուլիսին անդրադառնալով Ադրբեջանի կողմից իրականացրած պատերազմական գործողություններին, ասաց, որ հայկական կողմն այստեղից լուրջ դասեր ունի քաղելու: Նա նշեց, որ թեև հայ զինվորի ոգին կարևոր գործոն է, սակայն կարևոր համարեց նաև զինատեսակների ժամանակակից լինելը: «Մեր թշնամին սովորական թշնամի չէ, և նա դրել է երկրորդ ցեղասպանություն իրականացնելու խնդիր»,-ասաց նա և նշեց, որ դա նկատելի էր քաղաքացիական բնակչության նկատմամբ իրենց գործողություններով, զինվորների դիակների խոշտանգումներով:
«Իմ գնահատմամբ՝ սա ո՛չ հաղթանակ, ո՛չ պարտություն էր, այլ ահազանգ էր մեզ համար՝ հետևություններ անելու: Ես պատերազմական գործողության քաղաքականությունը կգնահատեի արտաքին քաղաքականության ձախողում»,-ասաց նա և նշեց, որ մենք պատերազմում մի ելք ունենք՝ թշնամուն ջախջախել և վերջնական հաղթանակի գալ:
Ինչ վերաբերում է մասնավորապես ԵՏՄ անդամակցությանը, ապա նա ասաց.«Այն քաղաքականությունը, որն իրականացնում էինք կանխելու համար պատերազմը, հանգեցրեց հենց պատերազմի»: Նա նշեց, որ Ադրբեջանին հիմնական զսպիչ գործոններից մեկը Արևմուտքն էր, ինչի հետ, ըստ նրա,Հայաստանը խորապես փչացրել է հարաբերությունները:
«Մեր զինվորն իր արյունով հատուցեց քաղաքական այրերի սխալների համար: Այսօր մենք պետք է քաղաքական միջոցներով կանխենք պատերազմը»,-ասաց նա և անհրաժեշտ համարեց Հայաստանի քաղաքական գծում արմատական փոփոխություններ իրականացնել, որովհետև չկա մի պետություն, որ շահագրգռված լինի մեր երկրի կողքին կանգնելու համար: Ըստ նրա մի սմերչ էլ չարժի Հայաստանի և Ռուսաստանի դարավոր հարաբերությունների վերաբերյալ հայտարարությունները:
«Տեղի ունեցած քառօրյա պատերազմում շատ մեսիջներ եղան մեզ համար, Ալիևը հասկացավ, որ այն երկիրը, որ դաշնակից է Հայաստանին համարվում, հավասար է վերաբերում մեզ և իրենց, և ավելին՝ նույնիսկ իր գործողություններում եղավ շատ դեպքերում պրոադրբեջանական»,-ասաց նա և նկատեց, որ կրակի դադարեցումը տեղի ունեցավ ՀՀ գլխավոր շտաբի պետի համաձայնությամբ և ոչ թե ԼՂ իշխանության մասնակցությամբ:
Ինչ վերաբերում է ԼՂ անկախության ճանաչման անհրաժեշտությանը, Արա Պապյանն ասաց, որ դեմ է դրան, քանի որ կարծում է, որ այն ՀՀ-ի մաս է՝ թե՛ դե ֆակտո, և թե՛ դե յուրե:
Նա նշեց, որ ժողովրդի պետության շուրջ համախմբումը, իշխանությունը ներկայացրեց որպես իշխանության շուրջ համախմբում և ավելացրեց, որ պետք չէ փշրել ժողովրդի վերջին հույսերը և կարողությունները: Նա կոչ արեց առնել շատ զենք և պատրաստվել պատերազմի, որովհետև ոչ մի գերտերություն մեզ հետ չի լինելու: Նա վստահություն հայտնեց, որ եթե պատերազմ լինի, ապա հաստատ հայերը կհաղթեն, ինչը ցույց տվեց նաև այս քառօրյա պատերազմը, սակայն նշեց, որ իր մտահոգությունը դրա համար տված գինն է լինելու:
Studio One