Հս. Կորեան կրկին բալիստիկ հրթիռ է արձակել

09:09 • 05.04.17

Կորեական թերակղզում իրավիճակը շարունակում է լարված մնալ. Փհենյանն արևելյան ափից կրկին բալիստիկ հրթիռ է արձակել, հայտնում է Reuters-ը՝ մանրամասնելով, որ հրթիռն ընկել է ծովը:


Հարավկորեական կողմի փոխանցմամբ՝ գործողության միջին շառավիղով հրթիռն անցել է 60 կմ. թռիչքի ընթացքում այն հասել է 179 կմ բարձրության:


Աղբյուրը նկատում է, որ սադրիչ բնույթի արձակումը տեղի է ունեցել Միացյալ Նահանգների և Չինաստանի նախագահներ Դոնալդ Թրամփի և Սի Ծինփինի վաշինգտոնյան հանդիպման նախաշեմին: Հայտնի է, որ երկկողմ հանդիպման շրջանակում քննարկվելիք առանցքային թեմաներից մեկն է լինելու Հյուսիսային Կորեայից եկող ռազմական սպառնալիքը:


Հայտնի է, որ միայն մարտ ամսվա ընթացքում Հյուսիսային Կորեան 6 բալիստիկ հրթիռ է արձակել, որից միայն 1-ի արձակումն է ձախողվել:


Նշենք, որ Փհենյանի կողմից վերջին սադրիչ քայլը դատապարտել են Ճապոնիան, Հարավային Կորեան և Միացյալ Նահանգները:


Մասնավորապես՝ ԱՄՆ պետքարտուղար Ռեքս Թիլերսոնը նշել է, որ «այս հարցի շուրջ պաշտոնական Վաշինգտոնը վաղուց արդեն ամեն ինչ ասել է և նոր մեկնաբանության կարիք չի տեսնում»: