Պայթուցիկը Սանկտ Պետերբուրգի մետրոյում կարող էր պատահաբար գործարկվել. աղբյուր
Հետաքննության վարկածներից մեկի համաձայն`պայթուցիկ սարքը Սանկտ Պետերբուրգի մետրոյում կարող էր պատահաբար գործարկվել: Այս մասին հաղորդում է Gazeta.ru-ն` վկայակոչելով իրավապահ մարմինների աղբյուրին:
«Վարկածներից մեկի համաձայն` դիտարկվում է պայթուցիկի պատահաբար գործարկվելու տարբերակը», - ասել է աղբյուրը: Տվյալ տեղեկության պաշտոնական հաստատում դեռևս չի ստացվել:
Ռուսաստանի Դաշնության քննչական կոմիտեն ավելի վաղ հաստատել էր պայթյունն իրականացնողի ինքնությունը: Վերջինս Ղրղզստանի 22-ամյա քաղաքացի Ակբարջոն Ջալիլովն է:
Հիշեցնենք, որ պայթյունը Սանկտ Պետերբուրգի մետրոյի կայարաններից մեկում տեղի է ունեցել երկուշաբթի: Վերջին տվյալների համաձայն` ահաբեկչության հետևանքով 14 մարդ է զոհվել: Նրանց թվում հայեր չկան:
ՌԴ Քննչական կոմիտեն քրեական գործ է հարուցել ահաբեկչության գործով:










