Բաքվում դատարանը 3 ամսով երկարաձգել է բլոգեր Ալեքսանդր Լապշինի կալանքը
Բաքվի Նասիմինի շրջանային դատարանն ուրբաթ երեք ամսով երկարաձգել է բլոգեր Ալեքսանդր Լապշինի կալանքը։ Ինչպես հայտնում է contact.az-ը, այդ մասին «Թուրան» գործակալությանն ասել է բլոգերի փաստաբան Էդուարդ Չերնինը։
Նրա խոսքով՝ քննությունը դա պատճառաբանել է լրացուցիչ քննչական միջոցառումների անցկացման անհրաժեշտությամբ։ Ըստ փաստաբանի՝ կալանքի ժամկետը երկարաձգվել է մինչև հուլիսի 15-ը։
Հարցին՝ պատրաստվում են բողոքարկել այդ որոշումը, Չերնինն ասել է, որ դեռ չգիտի, քանի որ դա պետք է քննարկել Լապշինի հետ։
Ռուսաստանի և Իսրայելի քաղաքացի հանդիսացող բլոգեր Ալեքսանդր Լապշինը ձերբակալվել է Մինսկում 2016 թվականի դեկտեմբերի 15-ին՝ Ադրբեջանի դիմումի համաձայն, և արտահանձնվել Բաքվին 2017 թվականի փետրվարի 7-ին:
Լապշինին սպառնում է 8 տարվա ազատազրկում 2011 թվականի ապրիլին, 2012 թվականի հոկտեմբերին և 2016 թվականի հունիսին Արցախ այցելելու, ինչպես նաև Ադրբեջանի քաղաքականությունը քննադատելու համար:
ՀՀ արտաքին գործերի նախարարության մամուլի խոսնակ Տիգրան Բալայանը, անդրադառնալով բլոգերի արտահանձնմանը, հայտարարել էր, որ Ալեքսանդր Լապշինի հետապնդումը, Ադրբեջան նրա արտահանձնումը խոսքի ազատության և ազատ տեղաշարժի, մարդու հիմնարար իրավունքների կոպտագույն ոտնահարում է, որը կրկին անգամ ի ցույց է դնում բռնապետության և ժողովրդավարության միջև առկա խորը անդունդը։










