Աբովյանի ԲԿ տեղափոխված 7 քաղաքացիները չեն ունեցել ո՛չ սննդային, ո՛չ շմոլ գազից թունավորում, ո՛չ որևէ կլինիկական ախտանիշ. ԲԿ

12:19 • 10.04.17

Քաղաքացիները, որոնք ըստ Արտակարգ իրավիճակների նախարարության հաղորդագրության, սննդային թունավորում ախտանիշով Բյուրեղավանից շտապօգնության մեքենայով տեղափոխվել են Աբովյանի բժշկական կենտրոն, «պրակտիկապես առողջ են եղել» և զրույցներից հետո դուրս են գրվել:

Այս մասին Tert.am –ին հայտնեց Աբովյանի բժշկական կենտրոնի ադմինիստրացիայից:

«Հիվանդներից ոչ մեկի մոտ որևէ պաթոլոգիկ վիճակ չի եղել, սննդային թունավորման որևէ ախտանիշ, ոչ էլ շմոլ գազից թունավորում: Իրենց հետ զրուցեցինք և ակնհայտ էր , որ ոչ մի պաթոլոգիկ իրավիճակ չկար: Առհասարակ, անհայտ իրավիճակ էր, մանավանդ, որ չէր կարող թունավորումը լինել մածնաբրդոշից»,-հայտնեց Մանուկյան ազգանունով ներկայացած աշխատակիցը:

Ըստ վերջինիս՝ հիվանդները հայտնել են, որ իրենք կրոնական կազմակերպություններից մեկի ներկայացուցիչներ են:

Ավելի վաղ տարածված հաղորդագրության համաձայն՝ ապրիլի 9-ին, ժամը 1.10-ին, շտապօգնության բրիգադից ոստիկանության Բյուրեղավանի բաժանմունք հաղորդում է ստացվել, որ «սննդային թունավորում» ախտորոշմամբ բուժօգնության են դիմել 1952 թ. ծնված Օվսաննա Բ.-ն, 1989 թ. ծնված Մագդա Բ.-ն, 1985 թ. ծնված Աբրահամ Բ.-ն, 1992 թ. ծնված Անգելինա Բ.-ն, 1997 թ. ծնված Էլբրետա Բ.-ն, 1995 թ. ծնված Դավիթ Բ.-ն և 1998 թ. ծնված Գալինա Բ.-ն: 

Ինչպես տեղեկացնում է ոստիկանության մամուլի ծառայությունը, պարզվել է, որ նրանք ապրիլի 8-ին, ժամը 22.45-ի սահմաններում, տանը վարունգով մածնաբրդոշ են պատրաստել և կերել, որից հետո ինքնազգացողությունները վատացել է և ահազանգել են շտապօգնություն: