Սիրիան կդադարի որպես պետություն գոյություն ունենալ, եթե գործող իշխանությունը հեռանա. երկրի փոխարտգործնախարար

17:27 • 10.04.17

Սիրիայի փոխարտգործնախարար Ֆեյսալ Միքդադը հայտարարել է, որ Սիրիան կդադարի գոյություն ունենալ որպես պետություն, եթե գործող իշխանությունը հեռանա, այս մասին գրում է РИА Новости-ն: 

«Մենք միշտ ասել ենք, որ Սիրիան առանց այս կառավարության ու նախագահի կպառակտվի, այս պետությունն ու նրա ինստիտուտները կդադարեն գոյություն ունենալ», - ասել է սիրիացի պաշտոնյան:

Ինչպես ավելի վաղ հայտնել է tert.am-ը՝ նա ասել է նաև, որ Թուրքիան պահանջել է, որ Իրանի մայրաքաղաք Թեհրանում սիրիական ճգնաժամի հարցով դռնփակ ժողով հրավիրվի: Ըստ նրա՝ թուրքական կողմը չի ցանկանում, որ լրատվամիջոցներն իմանան Սիրիայում ստեղծված նոր իրավիճակի վերաբերյալ Թուրքիայի իրական դիրքորոշման մասին:

Հայտնի է նաև, որ արդեն ծրագրվում է գաղտնի ժողովն անցկացնել ապրիլի 18-19-ը՝ Աստանայում սիրիական խնդրի շուրջ մայիսի 3-4-ին կայանալիք հավաքին ընդառաջ:


Հիշեցնենք, որ Միացյալ Նահանգներն ապրիլի 6-ի երեկոյան թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային, ինչն արվել է օրեր առաջ Իդլիբում սիրիացի զինվորականների կողմից քիմիական զենքի կիրառմանն ի պատասխան:

Սիրիայի պաշտպանության նախարարության ներկայացուցիչներն ավելի վաղ հաղորդել էին, որ ԱՄՆ-ի` սիրիական «Շայրաթ» ռազմաբազայի վրա իրականացված ավիահարվածի հետևանքով մահացել է 6 զինծառայող։

Հիշեցնենք, որ ապրիլի 4-ին Մարդու իրավունքների սիրիական դիտորդական կենտրոնը` վկայակոչելով սիրիացի ակտիվիստներին, հայտնել էր Իդլիբում տեղի ունեցած քիմիական հարձակման մասին, որի հետևանքով 58 մարդ էր զոհվել, մեծամասնությունը` երեխաներ: