G7-ի անդամ երկրների ԱԳ նախարարները ՌԴ-ի նկատմամբ պատժամիջոցների որոշում չեն կայացրել
«Մեծ յոթնյակի» (Մեծ Բրիտանիա, Գերմանիա, Իտալիա, Կանադա, ԱՄՆ, Ֆրանսիա, Ճապոնիա) երկրների արտաքին գործերի նախարարներն Իտալիայի Լուկա քաղաքում հրավիրված հանդիպման ժամանակ Ռուսաստանի նկատմամբ պատժամիջոցների վերաբերյալ որոշում չեն կայացրել։ Այս մասին հայտնել է Ֆրանսիայի արտգործնախարար Ժան-Մարկ Էյրոն, գրում է Reuters գործակալությունը:
Որոշ լրատվամիջոցներ էլ պնդում են, որ ՌԴ-ի նկատմամբ պատժամիջոցների հարցն առհասարակ չի քննարկվել հանդիպման ընթացքում:
Ավելի վաղ Մեծ Բրիտանիայի արտգործնախարար Բորիս Ջոնսոնը հայտարարել էր, որ մտադիր է հանդիպման ընթացքում պահանջել Ռուսաստանի նկատմամբ պատժամիջոցների խստացում: Բրիտանացի նախարարը պնդել է, որ G7-ի երկրները համատեղ հայտարարությամբ հանդես գան, որով կպահանջեին Ռուսաստանից պաշտոնապես հրաժարվել Բաշար ալ Ասադին սատարելուց:
Ֆրանսիայի արտգործնախարար Էյրոն հանդիպումից հետո նշել է, որ G7-ի անդամ երկրները համամիտ են այն հարցում, որ Սիրիայի նախագահ Բաշար ալ Ասադը չի կարող կազմել այդ երկրի ապագայի մի մասը: Ֆրանսիայի ԱԳՆ ղեկավարը նաև ընդգծել է, որ Սիրիայում իրավիճակի կարգավորման առաջին քայլը պետք է լինի կրակի դադարեցումը:










