Կանոնավոր համագործակցում ենք ՀՀ իրավասու մարմինների, այդ թվում՝ ԱԳՆ հետ՝ պայքարելու ճամփորդական փաստաթղթերի կեղծումների դեմ. ՀՀ-ում ԱՄՆ դեսպանատուն

14:41 • 27.04.17

Օրերս լուրեր տարածվեցին, որ Հայաստանի Հանրապետության արտաքին գործերի նախարարությունը վերջերս տեղեկանք է տրամադրել մի քաղաքացու, ով հանցանք կատարելու համար հետախուզման մեջ է գտնվում, ինչի արդյունքում քաղաքացին իբրև փորձել էր հայտնվել ԱՄՆ-ում:

ՀՀ ԱԳ նախարարի խոսնակ Տիգրան Բալայանը, սակայն, հերքել էր տեղեկատվությունը:

Այս առնչությամբ Tert.am-ը պարզաբանում խնդրեց նաև ՀՀ-ում ԱՄՆ դեսպանատնից, որտեղից տվեցին հետևյալ պատասխանը. «ԱՄՆ ներգաղթային օրենսդրության համաձայն արգելվում է ԱՄՆ դեսպանատան կողմից վիզայի առանձին գործերի վերաբերյալ տեղեկությունների տրամադրումը: Կեղծ փաստաթղթերի ներկայացումը քրեորեն պատժելի է թե՛ Հայաստանում, թե՛ Միացյալ Նահանգներում, իսկ ԱՄՆ դեսպանության իրավապահ հարցերով զբաղվող աշխատակիցները կանոնավոր համագործակցում են Հայաստանի իրավասու մարմինների, այդ թվում՝ Արտաքին գործերի նախարարության հետ՝ պայքարելու ճամփորդական փաստաթղթերի կեղծումների դեմ: Մանրամասների համար խորհուրդ ենք տալիս դիմել Հայաստանի իրավասու մարմիններին»:

ՀՀ ԱԳ նախարարի խոսնակն էլ երեկ անդրադառնալով հրապարակմանը՝ ասել էր. «Ցածրորակ լրագրությունը մնալու է այդպիսին, եթե հենց հեղինակները չեն ուզում կատարելագործվել, կրթվել։ Հակառակ դեպքում՝ կդիմեին ԱԳՆ, կիմանային, որ ԱՄՆ դեսպանություն կեղծ փաստաթուղթ է ներկայացվել։ Այդ կապակցությամբ ԱԳՆ-ն դիմել է ՀՀ գլխավոր դատախազություն և Ոստիկանություն՝ համապատասխան գործողություններ իրականացնելու համար»: 

Ավելի ուշ Տիգրան Բալայանը նաև գրառում էր կատարել ֆեյսբուքյան իր էջում՝ նշելով. «ԱԳՆ-ն հետախուզման մեջ գտնվող քաղաքացուն երկրից դուրս գալու իրավունք է տվել» խորագրով հոդվածի առնչությամբ հայտնում ենք, որ ս.թ. հունվարի 3-ին Երևանում ԱՄՆ դեսպանությունը հայտագրով դիմել է Արտաքին գործերի նախարարությանը՝ տեղեկացնելով, որ քաղաքացի Արսեն Հովսեփի Հակոբյանը դեսպանությանը ներկայացրել է ՀՀ ԱԳՆ կողմից 2016թ. սեպտեմբերի 5-ին տրամադրված դատվածության բացակայության մասին տեղեկանք, որը, սակայն, ակներև կեղծ փաստաթղթի նշաններ է պարունակում:

Նմանաբովանդակ դիմումով ԱՄՆ դեսպանությունը դիմել է նաև ՀՀ Ոստիկանության Կազմակերպված հանցագործությունների դեմ պայքարի գլխավոր վարչությանը: Ի պատասխան՝ ԱԳՆ-ին տեղեկացրել են, որ քաղաքացի Արսեն Հովսեփի Հակոբյանի կողմից ներկայացված տեղեկանքի վրա նշված համարի ձևաթուղթն օգտագործվել է այլ քաղաքացու համար համապատասխան տեղեկանք տրամադրելու համար, իսկ ապոստիլի համարի տակ գրանցվել է մեկ այլ քաղաքացու մասին տեղեկանքը վավերացնող ապոստիլը»: