Ազգայնական ցուցարարները գրոհել են Մակեդոնիայի խորհրդարանի շենքը. վիրավորվել է ավելի քան 100 մարդ (լուսանկարներ, տեսանյութ)
Սկոպյեում ցուցարարներն ապրիլի 27-ին գրոհել են Մակեդոնիայի խորհրդարանի շենքը, երբ խոսնակ է ընտրվել էթնիկ ալբանացի, գրում է BBC-ն:
Խորհրդարանում ծեծկռտուք է սկսվել, ինչի հետևանքով տասնյակ մարդիկ են վիրավորվել, այդ թվում՝ սոցիալ-դեմոկրատների առաջնորդ Զորան Զաևը, ում դեմքն արնաշաղախ է եղել:
Ցուցարարները՝ նախկին վարչապետ Նիկոլա Գրուևսկու ազգայնական կուսակցության աջակիցները, նոր ընտրություններ են պահանջում:
Զաևը կոալիցիա է ստեղծել էթնիկ ալբանական կուսակցությունների հետ, բայց նախագահն արգելափակել է կառավարություն կազմելու նրա փորձերը:
Մակեդոնիայի ազգայնականները ցույցեր են արել փողոցներում մինչ Զաևը փորձել է կոալիցիա ձևավորել:
Մարդկանց զայրացրել է կոալիցիայի որոշումը՝ խոսնակի պաշտոնում ընտրել էթնիկ ալբանացի Թալաթ Ջաֆերին:
Նշվում է, որ մոտ 200 ցուցարար դիմակով է եղել: Ականատեսները հատակին կոտրված ապակի են տեսել և արյան հետքեր:
Ոստիկանությունը ստիպված է եղել խլացնող նռնակներ նետել ցուցարարներին ցրելու, ինչպես նաև քաղաքական գործիչներին խորհրդարանի շենքից դուրս գալ թույլ տալու համար:
Ներքին գործերի նախարարության հաղորդմամբ՝ 102 մարդ բուժօգնություն է ստացել հիվանդանոցում, այդ թվում՝ 10 պատգամավոր և ոստիկան:


















