ԵՄ-ն պետք է բարեփոխվի, այլապես նրան կսպառնա Frexit-ի հեռանկարը. Ֆրանսիայի նախագահի թեկնածու Մակրոն

13:57 • 01.05.17

Ֆրանսիայի նախագահի թեկնածու, «Առաջ» շարժման առաջնորդ Էմանուել Մակրոնը հայտարարել է, որ Եվրամիությունը պետք է բարեփոխվի, այլապես նրան կսպառնա Frexit-ի հեռանկարը: Այդ մասին նախագահական ընտրությունների երկրորդ փուլից մեկ շաբաթ առաջ նա հայտարարել է BBC News-ին տված հարցազրույցում:


Մակրոնը վստահեցրել է, որ միշտ եղել և մնում է եվրոպամետ քաղաքական գործիչ:


«Նախընտրական արշավի ժամանակ ես մշտապես պաշտպանել եմ եվրոպական գաղափարները և եվրոպական քաղաքականությունը, քանի որ կարծում եմ, որ դա չափազանց կարևոր է ֆրանսիացի ժողովրդի համար»,- ասել է նա:


Բայց, Ֆրանսիայի նախագահի թեկնածուի կարծիքով, երկրի կեսը «զայրանում է այդ եվրոպական գաղափարի վրա»: Այդ պատճառով Մակրոնը վստահ է, որ Եվրամիությունը բարեփոխման կարիք ունի:


«Եթե ես որոշեմ քայլեր ձեռնարկել և շարունակել ԵՄ-ի ընթացիկ գործունեությունը, ես կդավաճանեմ իմ ժողովրդին, ես չեմ ուզում դա անել, որովհետև հաջորդ օրը մենք կստանանք Frexit կամ կրկին «Ազգային ճակատ»,- հայտարարել է Մակրոնը:


Ֆրանսիայի նախագահական ընտրությունների առաջին փուլում, որը տեղի է ունեցել ապրիլի 23-ին, Մակրոնը հավաքել է 24,01 տոկոս ձայն: Նրա հիմնական մրցակիցը՝ «Ազգային ճակատ» կուսակցության թեկնածու Մարին Լը Պենը, հավաքել է 21,3 տոկոս ձայն: Երկրորդ փուլը կանցկացվի մայիսի 7-ին:


Frexit բառը ստեղծվել է Brexit-ի (ԵՄ-ից Մեծ Բրիտանիայի դուրս գալը) համանմանությամբ` France (Ֆրանսիա) և exit (ելք) անգլերեն բառերի միակցմամբ: