Հնարավոր է՝ «Ծառուկյան» դաշինքից այդ 8 պատգամավորները լքեն խմբակցությունը և գործեն որպես անկախ պատգամավոր. Վիգեն Հակոբյան (տեսանյութ)
Այս պահի դրությամբ ավելի հավանական է համարվում, որ մանդատից հրաժարվելու դիմումները հետ վերցրած 8 պատգամավորները մանդատ ստանալուց հետո կլքեն «Ծառուկյան» դաշինքի խմբակցությունը: Այս մասին այսօր լրագրողների հետ հանդիպմանն ասաց քաղտեխնոլոգ Վիգեն Հակոբյանը:
Նրա տեղեկացմամբ՝ նման որոշման դեպքում այդ 8 պատգամավորները միայն կարող են անկախ պատգամավորի կարգավիճակով հանդես գալ: Եթե նախկին սահմանադրությամբ հնարավոր կլիներ նոր խմբակցություն ձևավորել, ապա այժմ դա չի թույլատրվում:
Վիգեն Հակոբյանը նաև չի բացառում, որ մի մասը «լեզու գտնի» Գագիկ Ծառուկյանի հետ։ «Սովորաբար, մենք տեսել ենք, որ շատ ավելի լուրջ անձնական և քաղաքական խնդիրներ են «ջրվել»: Նման սցենար ես չեմ բացառում»,- ասաց նա:
Ինչ վերաբերում է նրան, թե իշխանության մատը խառն էր այս գործընթացում, քաղտեխնոլոգը նշեց. «Ճշմարտանման է, որ կային դրդողներ, շահագրգիռ կողմեր: Ի վերջո ընտրություններից առաջ ենթադրվում էր, որ խորհրդարանի ընդդիմադիր հատվածի ձևավորման գործում իշխանությունը պետք է շահագրգիռ լինի, որպեսզի այն իր համար հնարավորինս հարմար լինի: Այսինքն՝ այնպիսի ոչ ընդդիմադիր սեգմենտ, որտեղ կլինեն մի շարք ոչ իշխանական կուսակցություններ, որոնք ներկայացված կլինեն խորհրդարանում, բայց մեծ խմբակցություն չեն ունենա: Հիմա Ծառուկյան դաշինքի դեպքում փոքր-ինչ «պերեբոր» ստացվեց»:
Հիշեցնենք, որ Կենտրոնական ընտրական հանձնաժողովը մայիսի 2-ին հրապարակել էր ինքնաբացարկի դիմումները, որտեղ «Ծառուկյան» դաշինքի 23 պատգամավորի անուն կար: Հրապարակման հենց հաջորդ օրը դաշինքի 12 պատգամավոր դիմեց ԿՀԸ՝ դիմումները հետ վերցնելու պահանջով, որոնցից 8-ի դիմումը բավարարվեց:










