Սիրիայի ընդդիմությունը հրաժարվել է անվտանգ գոտիներ ստեղծելու վերաբերյալ Ռուսաստանի առաջարկից

13:29 • 05.05.17

Սիրիայի զինված ընդդիմությունը մերժել է երկրում անվտանգ գոտիներ ստեղծելու վերաբերյալ Ռուսաստանի առաջարկը՝ այն որակելով որպես սպառնալիք երկրի ամբողջականությանը:

Ինչպես հայտնում է Reuters-ը, բացի այդ, ընդդիմությունը հայտարարել է, որ չի ընդունում Իրանին որպես հրադադարի ռեժիմի պահպանման երաշխավոր երկիր:

Հիշեցնենք, որ սիրիական հիմնախնդրի շուրջ Ղազախստանի մայրաքաղաք Աստանայում տեղի ունեցած բանակցությունների ընթացքում հրադադարի երաշխավոր երկրների՝ Ռուսաստանի, Իրանի և Թուրքիայի միջև հուշագիր է ստորագրվել, որը ենթադրում է Սիրիայի տարածքում դեէսկալացիոն գոտիների ստեղծում:

«Մենք ցանկանում ենք, որ Սիրիան պահպանի իր ամբողջականությունը, և դեմ ենք երկրի պառակտմանը: Ինչ վերաբերում է հուշագրին, ապա մենք դրա ստորագրմանը չենք մասնակցել ու չենք կարող լինել դրա մի մասը, քանի դեռ Իրանը ներկայացված է որպես երաշխավոր երկիր: Բացի այդ, մենք արդեն համաձայնագիր ունենք, ինչո՞ւ չեն զբաղվում դրա իրագործմամբ: Ինչո՞ւ դա թողած՝ հիմա էլ անցան անվտանգ գոտիների ստեղծմանը»,-նշել է ընդդիմության ներկայացուցիչ Ուսամա Աբու Զայիդը՝ նկատի ունենալով ավելի վաղ՝ դեկտեմբերին, Ռուսաստանի նախաձեռնությամբ կնքված հրադադարի հաստատման վերաբերյալ փաստաթուղթը:

Ընդդիմադիրը նկատել է, որ սիրիական հիմնախնդրի լուծման հարցում հիմնական խոչընդոտներից մեկն այն է, որ Ռուսաստանն ի վիճակի չէ կամ պարզապես չի ուզում իրագործել իր ստանձնած պարտավորությունները: