Հանովերում 50 հազար մարդ կտարհանվի Երկրորդ համաշխարհայինից մնացած ռումբերը վնասազերծելու համար

13:23 • 06.05.17

Մայիսի 7-ին գերմանական Ներքին Սաքսոնիա երկրամասի վարչական կենտրոն Հանովերում 50 հազար մարդ կտարհանվի Երկրորդ համաշխարհային պատերազմի տարիներից մնացած ռումբերը վնասազերծելու համար: Այս մասին հայտնում է Handelsblatt-ը:

Աղբյուրի հաղորդմամբ՝ կտարհանվեն բնակելի շենքերի և ծերանոցների բնակիչները, ինչպես նաև՝ մեքենաների անվադողերի մեկ գործարանի աշխատակիցներ:

Այսպիսով՝ սա կլինի ռումբերի վնասազերծման երկրորդ խոշորագույն գործողությունը Գերմանիայում. պատերազմի տարիներից մնացած ռումբերի վնասազերծմանն ուղղված խոշորագույն տարհանումն իրականացվել է անցած տարվա դեկտեմբերին բավարական Աուգսբուրգում, որտեղ մոտ 54 հազար մարդ տարհանվել էր, երբ շինարարական աշխատանքների ընթացքում հայտնաբերվել էր 3,8 տոննա քաշով ռումբ:

Նշվում է, որ ստուգումների արդյունքում պարզ կդառնա՝ արդյոք կասկածի տակ գտնվող յուրաքանչյուր վայրում ռումբեր են տեղադրված: Հաճախ ռումբեր հայտնաբերելու համար նախատեսված զգայակները սխալ ազդանշան են տալիս՝ հողում գտնելով այլ առարկաների մետաղյա մասեր: Այդ պատճառով անհրաժեշտ է, որպեսզի ականազերծող մասնագետները զգայակների ազդանշանից հետո փորեն հողն ու համոզվեն ռումբի առկայության մեջ: