Մոսկվայում 40-հարկանի բնակելի շենքում բռնկված հրդեհի հետևանքով տուժել է 22 մարդ (տեսանյութ)
Մոսկվայի հարավ-արևմուտքում 40 հարկանի բնակելի շենքում բռնկված հրդեհի հետևանքով տուժել է 22 մարդ, այս մասին հայտնում է РИА Новости գործակալությունը` հղում անելով ՌԴ արտակարգ իրավիճակների նախարարության Մոսկվայի գլխավոր վարչության իր աղբյուրին:
«Հիվանդանոց է տեղափոխվել 10 հոգի, որոնց թվում՝ 2 երեխա: Եվս 12 հոգու ցուցաբերվել է առաջին բուժօգնություն ամբուլատոր պայմաններում», - մանրամասնել է գործակալության զրուցակիցը:
Ավելի վաղ Արտակարգ իրավիճակների նախարարությունը հայտնել էր Պրոֆսոյուզնայա փողոցի վրա գտնվող շենքից 155 հոգու տարհանման մասին:
Հայտնի է, որ հրդեհը տարածվել է բնակելի շենքի էլեկտրական մալուխների միջոցով: Հրշեջ-փրկարարական ծառայության աշխատակիցներին արդեն հաջողվել է մարել այն:











