Մեծ Բրիտանիայի ոստիկանությունը պարզել է մահապարտ ահաբեկչի ինքնությունը. Թերեզա Մեյ

Մեծ Բրիտանիայի ոստիկանությունը պարզել է «Մանչեսթեր Արենա» մարզահամերգային համալիրում ահաբեկչություն իրականացրած մահապարտի ինքնությունը, բայց այժմ՝ հետաքննության ներկայիս փուլում, դեռ չի պատրաստվում հրապարակել նրա անունը: Այդ մասին հայտարարել է Մեծ Բրիտանիայի վարչապետ Թերեզա Մեյը՝ խոսելով վարչապետական նստավայրի դիմաց՝ կառավարության «Կոբրա» արտակարգ իրավիճակների հանձնաժողովի հանդիպումից հետո, գրում է The Independent-ը:

Մեծ Բրիտանիայի վարչապետը նշել է, որ ոստիկանությունը կարծում է՝ ահաբեկչությունը մի հոգի է իրականացրել, բայց այժմ փորձում է պարզել, թե արդյոք նա գործել է միայնակ:

«Ահաբեկիչները երբեք չեն հաղթի, և մեր արժեքները, մեր երկիրը և մեր ապրելակերպը միշտ կգերակայի»,- ասել է Թերեզա Մեյը:

Հիշեցնենք, որ մայիսի 22-ի երեկոյան Մանչեսթերի մարզահամերգային համալիրում, որտեղ ընթացել է ամերիկյան երգչուհի Արիանա Գրանդեի համերգը, տեղի է ունեցել պայթյուն՝ խլելով 22 մարդու կյանք:

Հայտնի է, որ պայթյունը որոտացել է համերգի վերջում, ինչից հետո 21.000 մարդ տեղավորող մարզադաշտում խուճապ է սկսվել:

Ոստիկանությունը հետաքննում է տեղի ունեցածի հանգամանքները:

Միացյալ Թագավորության վարչապետ Թերեզա Մեյն իր ցավակցությունն էր հայտնել երեկ երեկոյան Մանչեսթեր քաղաքի մարզադաշտում տեղի ունեցած պայթյունի հետևանքով զոհվածների հարազատներին՝ հավելելով, որ  կատարվածը սարսափելի ահաբեկչական գործողություն է: