Գերմանիայում չորս ենթադրյալ ահաբեկիչ է ձերբակալվել (լուսանկարներ)

20:16 • 12.06.17

Գերմանական Համբուրգ քաղաքի թաղամասերից մեկում ոստիկանները ձերբակալել են «Ջաբհաթ ան-Նուսրա» ահաբեկչական խմբավորման չորս ենթադրյալ անդամի: Այս մասին հայտնում է Bild-ը:

Աղբյուրի հաղորդմամբ՝ հատուկ գործողությունն անցկացվել է տեղական ժամանակով ժամը 4:30-ին: Հատուկ ծառայությունների աշխատակիցները ձերբակալել են 39-ից 51 տարեկան չորս տղամարդու: Ենթադրվում է, որ նրանցից երեքը հարազատ եղբայրներ են, իսկ չորրորդը նույնպես նրանց բարեկամն է:

Գերմանացի քննիչները ենթադրում են, որ 2012 թվականին նրանք միացել են «Ջաբհաթ ան-Նուսրա» ահաբեկչական խմբավորմանը և Սիրիայի տարածքում մասնակցել կառավարական ուժերի դեմ իրականացվող ռազմական գործողություններին:

Նշվում է, որ կասկածյալներին ազատազրկելու վերաբերյալ որոշումը կկայացվի հունիսի 13-ին անցկացվելիք դատի ժամանակ: