Հյուսթոն քաղաքի լրագրողական թիմը փրկել է ջրհեղեղի «ճիրաններում» հայտնված բեռնատարի վարորդի կյանքը (լուսանկարներ, տեսանյութեր)
Բրիտանական The Daily Mail-ը հրապարակել է տեսանյութ, որում ցուցադրվում է այն պահը, երբ լրագրողը դադարեցնում է լուրերի հաղորդումն ամերիկյան Հյուսթոն քաղաքում և սկսում փրկել ջրհեղեղի «ճիրաններում» հայտնված տղամարդու կյանքը:
Բրենդի Սմիթը հաղորդում էր վարում Հյուսթոն քաղաքում ջրհեղեղի մասին KHOU II թվային ալիքի համար, երբ նկատել է կամրջի տակ ջրի մեջ հայտնված բեռնատարն ու դրա մեջ գտնվող տղամարդուն: Այդ պահին Սմիթը դադարել է լուրեր հաղորդել և շտապել է տղամարդու կյանքը փրկելու:
Նա կանգնեցրել է ոստիկանական մեքենան, որը բարեբախտաբար մեքենային ամրացված նավակ էր քարշ տալիս, և հորդորել է ոստիկանին մոտենալ բեռնատարին՝ ասելով, որ այն ջրի մեջ է:
Մինչ ոստիկանությունը կսկսեր փրկարար նավակն ուղղել դեպի բեռնատարը, Սմիթը վարորդին կոչ է արել խուճապի չմատնվել: Տղամարդը մինչ այդ արդեն մինչև արմունկները ջրի մեջ է գտնվել:
Կարճ ժամանակ անց հեռարձակումն ընդհատվել է թրջված սարքավորումների պատճառով: Սմիթն, այնուամենայնիվ, շարունակել է տեսագրել այն պահը, երբ ոստիկանությունը հասել է վարորդին օգնության և նրան դուրս բերել բեռնատարից:
Հյուսթոնը հայտնվել է աղետալի ջրհեղեղի տակ ԱՄՆ Տեխաս նահանգին պատուհասած «Հարվի» փոթորկի պատճառով: Որոշ վայրերում վերջին 72 ժամվա ընթացքում մեծ քանակությամբ տեղումներ են գրանցվել, և ըստ օդերևութաբանների կանխատեսումների՝ անձրևները շարունակվելու են մինչև ուրբաթ:
Հյուսթոնի արտակարգ ծառայություններն արձագանքել են բնակիչների հազարավոր օգնության կանչերի:
Իշխանությունները մարդկանց կոչ են արել չվերադառնալ Արանզաս շրջան, որին ավելի վաղ հարվածել է փոթորիկը: Արտակարգ ծառայությունները շարունակում են այնտեղ որոնել կորած անձանց:















