Ուկրաինայի ՆԳ փոխնախարարը հայտարարել է, որ 2014 թվականից երկրում վարկաբեկման արշավ է իրականացվում Արսեն Ավակովի դեմ
Ուկրաինայի ներքին գործերի փոխնախարար Անտոն Գերաշչենկոն հայտարարել է, որ երկրի նախկին նախագահ Պյոտր Պորոշենկոն իր նախագահության տարիներին ամեն ինչ արել է, որ վարկաբեկի ներքին գործերի նախարար Արսեն Ավակովին:
«Իր նախագահության տարիներին Պյոտր Պորոշենկոն մշտապես ամեն ինչ անում էր, որպեսզի վարկաբեկեր ներքին գործերի նախարարի կերպարը և այն բարեփոխումները, որ նա կատարել է: Մենք տեսել ենք վարկաբեկման համակարգային արշավներ: Երբ մենք նոր պարեկային ոստիկանություն ստեղծեցինք, արշավ սկսվեց այն մասին, թե նրանք անընդհատ վթարի են ենթարկում մեքենաները: Կամ այն մասին, որ այդ նոր ոստիկանները անփորձ են: Բայց նրանք, անկասկած, ավելի լավն են նրանցից, որոնք կային»,-ասել է Գերաշչենկոն «РБК-Украина» գործակալությանը տված հարցազրույցում:
Նա նշել է, որ Պորոշենկոյի հեռանալուց հետո համակարգային վարկաբեկում չկա, իսկ նախագահ Վլադիմիր Զելենսկին ցանկանում է, որ երկրում «կոռուպցիայի ու հանցավորության դեմ իրական պայքար մղվի»:
«Մարդկանց խմբեր կան, որոնք դժգոհ են Ներքին գործերի նախարարության ղեկավարի աշխատանքից: Դա «Ձայն» խմբակցությունն է, լիբերալ, ինչպես «Ժողովրդ ծառայի» մի մասը: Բայց եթե ձեզ ինչ-որ բան դուր չի գալիս, ասեք՝ ինչն այնպես չէ, մենք պատրաստ ենք փոխվել: Բայց այն մարդիկ, որոնք ստորագրել են Ավակովի հրաժարականի համար, ոչ մի անգամ չեն եկել նախարարի կամ ինձ մոտ և ասել՝ դուք ճիշտ չեք աշխատում, այլ կերպ աշխատեք: Այսինքն՝ հասարակության մեջ այդպիսի տպավորություն է ստեղծվել, որ Արսեն Ավակովը վատն է: Դրա հիմքը դրվել էր դեռևս 2014 թվականին: Պորոշենկոն բոլոր ջանքերը ներդրել էր նախարարի համակարգային վարկաբեկման համար, որպեսզի թուլացներ նրան որպես քաղաքական գործիչ և կոալիցիայի անդամ»,-ասել է Գերաշչենկոն:
Նրա խոսքով` երբ Պորոշենկոն դարձավ նախագահ, նա պնդում էր, որ Ավակովը հեռանա ներքին գործերի նախարարի պաշտոնից և զբաղեցնի ցանկացած այլ պաշտոն` էկոնոմիկայի նախարար, ֆինանսների նախարար և այլն:
«Այն ժամանակ՝ ընտրություններից հետո, մի ամիս կոալիցիա չէր կազմվում, քանի որ Պորոշենկոն ասում էր. «Վերցրեք ձեզ 10 նախարարական պորտֆել, միայն տվեք ինձ Ներքին գործերի նախարարությունը»: Դա տեղի չունեցավ, դրա համար էլ սկսվեց համակարգային վարկաբեկում: Բայց դրա արդյունքում այդ 5 տարվա ընթացքում իշխանության մեջ ուժերի հավասարակշռություն կար: Ինչպես ինձ ասել է ընկերներիցս մեկը, որը շատ լավ գիտի Պորոշենկոյին, եթե այն ժամանակ՝ 2014 թվականի աշնանը, Ավակովը հեռանար, Պորոշենկոն մինչև իր ժամկետի ավարտը չէր ղեկավարի»,-ասել է փոխնախարարը:
Ավելի վաղ Ուկրաինայի նախագահ Վլադիմիր Զելենսկին հայտարարել էր, որ չի առաջարկել ներքին գործերի նախարար Արսեն Ավակովին լքել պաշտոնը, բայց պատրաստվում է հանդիպել նրա հետ:
Ինչպես ավելի վաղ տեղեկացրել էր Tert.am-ը, հունիսի 2-ին Ուկրաինայի Գերագույն ռադայում ստորագրահավաք էր սկսվել երկրի ներքին գործերի նախարար Արսեն Ավակովի հրաժարականի պահանջով:










