«ԱՄՆ-ն, ՌԴ-ն հարձակման են ենթարկվել և պարտվել պատերազմներում՝ չնայած միջուկային զենք ունեին». Քարնեգի հիմնադրամի փոխնախագահը՝ միջուկային զենքի՝ պատերազմի զսպման միջոց լինելու մասին

17:57 • 02.02.21

Միջազգային խաղաղության Քարնեգի հիմնադրամի ուսումնասիրությունների կենտրոնի փոխնախագահ Ջորջ Պերկովիչն ասել է, որ միջուկային զենքը որպես զսպման ռազմավարություն օգտագործելը պարտադիր չէ, քանի որ թե ԱՄՆ-ն և Խորհրդային Միությունը հարձակման են ենթարկվել և պարտվել պատերազմներում՝ չնայած, որ միջուկային ռումբեր են ունեցել: Այս մասին Պերկովիչն ասել է իրանական Tehran Times թերթին տված հարցազրույցի ընթացքում:

Ռուսաստանի նախագահ Վլադիմիր Պուտինն ուրբաթ օրը ստորագրել է օրենք, որով վավերացվում է Միացյալ Նահանգների հետ հարձակողական սպառազինությունների վերահսկման հիմնական պայմանագրի ՝ New START-ի ժամկետի երկարացումը: Փաստորեն, ԱՄՆ-ի նոր նախագահ Ջո Բայդենը, ևս հինգ տարով երկարացնելով Մոսկվայի հետ կնքված New START պայմանագիրը, ցույց է տվել իր ողջամտությունը, նշել է թերթը: Որոշ դիտորդներ կարծում են, որ Միացյալ Նահանգներն ավելին պետք է անի `ամերիկացիներին և ամբողջ աշխարհին հավաստիացնելու, որ ռացիոնալությունը վերադառնում է ԱՄՆ-ի միջուկային քաղաքականություն:

Փորձագետը կարծում է, որ միջուկային զենքը կարող է զսպման միջոց լինել լայնածավալ պատերազմների համար, սակայն միևնույն ժամանակ այն կարող է հրահրել ավելի ցածր մակարդակի պատերազմներ:

Պատասխանելով լրագրողի այն հարցին՝  արդյոք միջուկային զենք ունեցող մի քանի երկրների կողմից մյուսների նկատմամբ արգելք սահմանելը ճիշտ է, թե ոչ, Պերկովիչն ասել է, որ դա խնդրահարույց հարց է և հենց դրա համար էլ Միջուկային զենքի չտարածման մասին պայմանագրի շրջանակներում կոչ է արվում կրճատել և վերացնել միջուկային զենքը:

Ամբողջ աշխարհում կան միջուկային զենքից ազատ մի շարք գոտիներ, ինչպես օրինակ Լատինական Ամերիկան, Աֆրիկան, Հարավային Խաղաղ օվկիանոսի տարածաշրջանը, Կենտրոնական Ասիան, Անտարկտիդան, նշել է փորձագետը և հավելել. «Այն շրջաններում, որտեղ միջուկային զենք է տեղակայված, կարծում եմ, որ ներգրավված պետությունները պետք է զինաթափման վերաբերյալ փուլ առ փուլ բանակցություններ վարեն և հետևեն այդ պայմանավորվածությունների գործադրմանը»:

Անդրադառնալով ԱՄՆ-ում միջուկային զենքի կիրառմանը՝  փորձագետը նշել է, որ դրա կիրառման վերաբերյալ միանձնյա որոշում է կայացնում Միացյալ Նահանգների նախագահը, սակայն այս հարցի վերաբերյալ Կոնգրեսում մի շարք քննարկումներ են ընթանում: Իսկ ինչ վերաբերվում է միջուկային ռազմավարության մշակմանը, ապա շատ հարցեր որոշվում են Կառավարության մի շարք ստորաբաժանումների և Կոնգրեսի կողմից: