Հնդկաստանում հրապարակավ այրել են Թունբերգի և Ռիհաննայի լուսանկարները` նախազգուշացնելով «չխառնվել Հնդկաստանի ներքին գործերին» (լուսանկարներ)
Հնդկաստանի Դելի քաղաքում հակացույցի մասնակիցներն այրել են շվեդ բնապահպան Գրետա Թունբերգի լուսանկարով խամաճիկը՝ Twitter-ում հնդիկ ֆերմերների ցույցերին անդրադառնալու և նրանց աջակցելու համար, հաղորդում է The Guardian-ը։
Նշվում է, որ մարդկանց բազմությունը հավաքվել է Դելիում՝ ի նշան հայտնի մարդկանց, այդ թվում՝ Թունբերգի և փոփ երգչուհի Ռիհաննայի դեմ բողոքի, որոնք, նրանց խոսքով, Հնդկաստանում ֆորմերների ցույցերի ֆոնին «տրամադրություն են բորբոքել»։
Հակացույցերի ընթացքում հրկիզել են Թունբերգի և Ռիհաննայի լուսանկարներով խամաճիկները՝ նախազգուշացնելով «չխառնվել Հնդկաստանի ներքին գործերին»։
Նշվում է, որ Թունբերգը, որը Twitter-ում հնդիկ ֆերմերներին աջակցելու եղանակների, օրինակ՝ հեշթեգերի, խնդրագրերի ցանկ էր ներկայացրել, երկրի ոստիկանության կողմից մեղադրվում է «Հնդկաստանի դեմ միջազգային հանցավոր դավադրության համար»։
Ավելի վաղ հաղորդվել էր, որ Հնդկաստանը Ռիհաննային, Թունբերգին, ամերիկացի իրավաբան և ակտիվիստ Մինա Հարիսին՝ ԱՄՆ փոխնախագահ Քամալա Հարիսի զարմուհուն, քննադատել է երկրում շաբաթներ շարունակ բարեփոխումների դեմ բողոքող հնդիկ ֆերմերների ցույցերին անդրադառնալու, «անարժանահավատ և անպատասխանատու հայտարարություններ հնչեցնելու համար»
«Ինչո՞ւ մենք չենք խոսում այս մասին»,- օրերս սոցցանցերում գրել էր Ռիհաննան՝ կից հրապարակելով Հնդկաստանում ընթացող ցույցերից լուսանկար։
Ցույցերի առնչությամբ Twitter-ում գրառում էր կատարել նաև Թունբերգը․ «Մեր համերաշխությունն ենք հայտնում հնդիկ ֆերմերներին»։
«Նախքան մեկնաբանություններ հնչեցնելը, մենք կոչ ենք անում ճշտել փաստերը»,- ասված է Հնդկաստանի արտաքին գործերի նախարարության հայտարարության մեջ:
Նշենք, որ Հնդկաստանում շաբաթներ շարունակ ընթանում են բողոքի ակցիաներ․ տասնյակ հազարավոր ֆերմերներ զայրացած են և կարծում են, որ նոր ընդունված օրենքները ձեռնտու են խոշոր մասնավոր գնորդներին՝ ի հաշիվ արտադրողների: Նրանք ավելի քան երկու ամիս բողոքի ակցիա են անում մայրաքաղաք Նյու Դելիի մատույցներում։














