Երիտասարդները դառնում են բնապահպանական գործընթացների լիարժեք մասնակից․ Համբարձում Մաթևոսյան

18:18 • 24.10.25

Շրջակա միջավայրի նախարար Համբարձում Մաթևոսյանը նախարարությունում հյուրընկալեց Կլիմայի փոփոխության հարցերի երիտասարդական խորհրդի անդամներին։ Հանդիպումն առանձնապես կարևոր էր, քանի որ, նախարարի համոզմամբ, հենց երիտասարդներն են ապրելու այն ապագայում, որը կառուցվում է այսօր։

Նախարարը բարձր գնահատեց երիտասարդների հետաքրքրասիրությունը, համարձակությունն ու նորարարական գաղափարները՝ դրանք համարելով այն ուժը, որը կարող է փոխել Հայաստանը և աշխարհը։

«Այդ համոզմունքով էլ 2025 թվականի հունիսին կյանքի է կոչվել Շրջակա միջավայրի նախարարությանը և ՅՈՒՆԻՍԵՖ-ին առընթեր Կլիմայի փոփոխության հարցերով երիտասարդական խորհուրդը։

Այսուհետ երիտասարդների ձայնը ոչ միայն լսելի է լինելու, այլ նաև ներառվելու է որոշումների կայացման գործընթացներում՝ հնարավորություն տալով ներկայացնել իրենց համայնքների խնդիրներն ու բնապահպանական պատկերացումները ապագայի մասին»,-նշեց նախարարը։

Հանդիպման ընթացքում քննարկվել են արդեն իրականացվող բնապահպանական նախաձեռնությունները, և նախարարը նշել է, որ նախարարությունը պատրաստ է աջակցել երիտասարդների նոր առաջարկների իրագործմանը։

Նախարարը ներկայացրել է նաև COP 17-ի նախապատրաստական աշխատանքները՝ ընդգծելով, որ համաժողովը կլինի առավել ներառական, և երիտասարդների ներգրավվածությունը անհրաժեշտ է գործընթացի բոլոր փուլերում։

Առանձին անդրադարձ է եղել Երիտասարդների տեղական համաժողովին (LCOY)․ խորհրդի անդամները նախարարին են փոխանցել COP 30-ին ընդառաջ ընդունված Հայաստանի Ազգային երիտասարդական հայտարարությունը, որն ընդգրկվելու է Գլոբալ երիտասարդական հայտարարության կազմում և ներկայացվելու է Բրազիլիայում՝ այս տարվա նոյեմբերին։

Հանդիպումն անցել է ջերմ մթնոլորտում․ երիտասարդները մեծ հետաքրքրությամբ հարցեր են ուղղել միջազգային գործընթացների և շրջակա միջավայրի ոլորտի ծրագրերում իրենց ներգրավվածության հնարավորությունների վերաբերյալ։