Գիտական կազմակերպությունների ֆինանսական ոլորտներում խախտումներ են հայտնաբերվել

Այս տարի ապրիլ-հունիս ամիսներին առաջին անգամ մոնիթորինգի են ենթարկվել գիտական կենտրոնները։

Ինչպես այսօրվա ասուլիսին տեղեկացրեց ԿԳՆ գիտական պետական կոմիտեի նախագահ Սամվել Հարությունյանը, 6 ծրագրի մասով մոնիթորինգն իրականացվել է 3 գիտական կազմակերպությունում, որոնցից ԵՊՀ-ում՝ 4 ծրագիր, ԿԳՆ Բժշկակենսաբանական միջազգային հետբուհական կենտրոնում (ԲԿՄՀՈՒԿ)՝ 1 ծրագիր և ԳԱԱ «Վ.Համբարձումյանի անվան Բյուրականի աստադիտարան» ՊՈԱԿ-ում՝ 1 ծրագիր։ «Բացահայտվել են թե իրավական, թե տնտեսական բնույթի խախտումներ»,- տեղեկացրեց Հարությունյանը։

Նա հաղորդեց, որ ԲԿՄՀՈՒԿ-ը ստացել է 9 մլն-ից ավելի ֆինանսավորում, սակայն ստուգման պահին ծախսած է եղել ավելի քան 1 միլիոնը, «այսինքն՝ գումարը ստացել են, բայց չեն ծախսել, իսկ մնացած միջոցների առումով տեղի է ունեցել պետական միջոցների ոչ նպատակային ծախսում»։ «Խախտվել է նաև գնումներ կատարելու ընթացակարգը, կենտրոնում գնումներ կատարող մարմին չի ստեղծվել, բացի այդ, այնպիսի ապրանքների համար, ինչպիսիք են բենզին, ավտոգազ, տպագրական ներկերի և սարքերի ձեռբերման դեպքում որևէ փաստաթղթային հիմնավորվածություն կամ մասնագիտական տեխնիկական եզրակացություն չի արձանագրվել»,- ասաց կոմիտեի նախագահը։

Հարությունյանը հաղորդեց, որ ԲԿՄՀՈՒԿ-ն առհասարակ կոմիտե չի ներկայացրել 2011թ. առաջին եռամսյակի որևէ ֆինանսական հաշվետվություն, որն իրենց միջև կնքված պայմանագրի խախտում է։

Բյուրականի աստղադիտարանին, ըստ բանախոսի, տրամադրվել է ֆինանսավորում գործուղումների նպատակով, որի մի մասը չի իրացվել, և պիտի արձանագրվեր որպես դեբիտորական պարտք, սակայն դա ևս չի եղել։

«Այս բոլոր բացթողումների հետ կապված համապատասխան հանձնարարականներ են տրվել հիմնարկներին, որոնք այս բոլոր բացթողումները պետք է շտկեն 2-3 ամիսների ընթացքում և ներկայացնեն համապատասխան հաշվետվություն»,- նշեց նա։

Ֆինանսական խախտումների մասով պատասխանատվության ենթարկելու մասին հարցին ի պատասխան Հարությունյանն ասաց. «Դե էդ բացթողումներն էնպիսին են, որ ուղղման ենթակա են, սարսափելի բաներ չեն… բայց դե պետական միջոցներից տրամադրված գումարները պիտի ծախսվեն նպատակային»։