Fun-Vii՝ սմարթֆոնն անիվների վրա, ապագայի ավտոմեքենան (տեսանյութ)

Տոկիոյի Tokyo Motor Show 2011 ավտոսրահում Toyota ընկերությունը ներկայացրել է Fun-Vehicle Interactive Internet կոնցեպտուալ ավտոմեքենան (բառացի՝ ուրախ ինտերակտիվ ինտերնետ մեքենա) կամ ինչպես ընկերության տնօրենն է արտահայտվել՝ սմարթֆոն անիվների վրա:

Երեք տեղանի Fun-Vii ավտոմեքենան կոչված է ցույց տալու ավտոմեքենաշինության ապագան Toyota-ի դիզայներների ու մասնագետների աչքերով: Մեքենայի սերիական արտադրություն չի պլանավորվում: Կոնցեպտի հիմնական առանձնահատկությունը կայանում է սենսորային վահանակները, որ տեղադրված են մեքենայի դռների արտաքին մակերևույթին, իսկ թե ինչպես պետք է օգտագործվեն այդ ահռելի սենսորային էկրանները, ընկերությունը դեռ լիովին չի բացահայտել:

Իհարկե Fun-Vii-ն միացած է ինտերնետին, մշտապես թարմացնում է իր ծրագրային ապահովումը, կարողանում է կապ հաստատել խանութների ու ռեստորանների հետ, ինչպես նաև՝ հետևել ճանապարհային խցանումներին: Կառավարումն իրականացվում է կամ սովորական ներսի սալոնը փոխարինելու եկած սենսորային էկրաններով, կամ սմարթֆոնի օգնությամբ: Ընդ որում՝ սմարթֆոնի օգնությամբ կարելի է գործի գցել շարժիչը, բացել/փակել դռները կամ իմանալ ավտոմեքենայի կայանման դիրքի մասին:

Բացի այս ամենից, վարորդը և ուղևորները կարող են հիանալ լրացված իրականության դետալներով, տեղեկատվությունը ստանալ ապակու՝ իրենց հարմար մասում, շփվել մարդկային խոսքը ճանաչող բորտ-համակարգչի հետ և այլն: